दू दिन ले लापता मनखे के शव तालाब म तैरत मिलिस, जांच म जुटिस पुलिस

धमतरी, 27 सितंबर 2020। दू दिन ले लापता मनखे के शव शनिवार के तालाब म तैरत मिलिस। सूचना मिलत ही अर्जुनी पुलिस मौका म पहुंचगे। सूत्र मन ले मिले जानकारी के अनुसार शनिवार मंझनिया अर्जुनी थाना क्षेत्र के ग्राम देवपुर के तालाब म एक मनखे के लाश देखे गिस, जोन ह गांव के ही मनखे रामकुमार के बताये जावत हे। वो 2 दिन ले घर ले लापता रिहिस। ओखर गला म उंखरे ही लूंगी बंधे हे अउ शरीर म कुछ चोट के निशान घलो मिले हे। एखर ले हत्या के आशंका जताये जावत हे। सूचना म एएसपी मनीषा ठाकुर, अर्जुनी थाना प्रभारी उमेन्द्र कुमार टंडन अउ स्टाफ मौका म पहुंचिन। मर्ग कायम करके जांच करे जावत हे। एएसपी ह बताइस कि तालाब म लापता मनखे के शव मिले हे। पुलिस जांच करत हे। पीएम रिपोर्ट के बाद मामला के असल सच्चाई के पता चल पाही।