मेडिसिटी विकास के दिशा म बड़का उपलब्धि: चार महीना म जमीन लीज अउ रजिस्ट्री पूरा, ₹680 करोड़ के लागत ले बनही 300 बिस्तर वाला बॉम्बे हॉस्पिटल
रायपुर, नवा रायपुर ल देश के प्रमुख हेल्थकेयर हब के रूप म विकसित करे के दिशा म एक ठन महत्वपूर्ण उपलब्धि दर्ज करे गे हे। मुख्यमंत्री श्री विष्णु देव साय के उपस्थिति म नवा रायपुर स्थित मंत्रालय महानदी भवन म देश के प्रतिष्ठित बॉम्बे हॉस्पिटल एंड मेडिकल रिसर्च सेंटर अउ नवा रायपुर विकास प्राधिकरण के बीच 15 एकड़ जमीन के लीज एग्रीमेंट म दस्खत करे गिस। ए समझौता नवा रायपुर म प्रस्तावित मेडिसिटी के विकास ल नवा गति दीही।
ए परियोजना ले सिरिफ राज्य के हेल्थकेयर इंफ्रास्ट्रक्चर ह मजबूत नइ होही, भलुक निवेश के क्षेत्र म छत्तीसगढ़ के तेज अउ भरोसेमंद प्रशासनिक काम-काज के घलो उदाहरण बनही। राज्य सरकार कोति ले 24 सितंबर 2025 के निवेश आमंत्रण जारी करे के बाद सिरिफ चार महीना के भीतर जमीन चिन्हांकन, जरूरी स्वीकृति अउ रजिस्ट्री के प्रक्रिया पूरा कर ले गे हे, जेन ह अपन आप म एक ठन नवा बेंचमार्क हरे।
नवा रायपुर विकास प्राधिकरण कोति ले आबंटित 15 एकड़ जमीन म बॉम्बे हॉस्पिटल ट्रस्ट डहार ले लगभग ₹680 करोड़ के लागत ले 300 बिस्तर वाला अत्याधुनिक मल्टी सुपर-स्पेशलिटी हॉस्पिटल स्थापित करे जाही। ए अस्पताल ह ट्रस्ट के देश म चौथा सुपर स्पेशलिटी हॉस्पिटल होही। एखर ले पहली मुंबई, इंदौर अउ जयपुर म ट्रस्ट के सुपर स्पेशलिटी हॉस्पिटल सफलतापूर्वक चलत हे।
बॉम्बे हॉस्पिटल के माध्यम ले कार्डियक साइंसेज, कैंसर इलाज, न्यूरोलॉजी, ऑर्थोपेडिक्स, क्रिटिकल केयर, ऑर्गन ट्रांसप्लांट सहित कई ठन उन्नत चिकित्सा सेवा मन उपलब्ध होही। एखर शुरू होय ले छत्तीसगढ़ अउ आस-पास के राज्य के मरीज मन ल गंभीर बीमारी के इलाज बर मुंबई या दिल्ली जइसे महानगर कोति जाय ल नइ परही।
ए परियोजना ले 500 ले जादा सीधा रोजगार के अवसर बने के संभावना हे, जेमा डॉक्टर, सर्जन, नर्स, पैरामेडिकल स्टाफ अउ मेडिकल टेक्नीशियन शामिल रही। एखर संगे-संग हेल्थकेयर सप्लाई चेन, सेवा अउ सहयोगी क्षेत्र मन म बड़का पैमाना म अप्रत्यक्ष रोजगार घलो पैदा होही, जेखर ले स्थानीय अर्थव्यवस्था ल भारी बढ़ावा मिलही।
मुख्यमंत्री श्री विष्णु देव साय ह ए मौका म कहिन के बॉम्बे हॉस्पिटल के स्थापना ले नवा रायपुर म मेडिसिटी के सपना साकार होय के दिशा म निर्णायक कदम उठाय गे हे। उमन कहिन के एखर ले प्रदेश के नागरिक मन ल अपनेच राज्य म विश्वस्तरीय सुपर स्पेशलिटी स्वास्थ सेवा मिलही अउ युवा मन ल गुणवत्तापूर्ण रोजगार के अवसर मिलही।
मुख्यमंत्री ह ए घलो कहिन के छत्तीसगढ़ सरकार स्वास्थ के क्षेत्र म बुनियादी सुविधा मन के लगातार विस्तार बर प्रतिबद्ध हे। बॉम्बे हॉस्पिटल जइसे प्रतिष्ठित संस्थान के नवा रायपुर म निवेश करना राज्य के नीतिगत स्थिरता, तेज निर्णय क्षमता अउ निवेशक-अनुकूल वातावरण उपर भरोसा के प्रमाण हरे।
ए परियोजना छत्तीसगढ़ औद्योगिक विकास नीति 2024–30 के अंतर्गत स्वास्थ जइसे रणनीतिक क्षेत्र मन ल दिए जात विशेष प्रोत्साहन अउ समयबद्ध क्रियान्वयन के प्रत्यक्ष परिणाम हरे। एखर ले नवा रायपुर ल सेंट्रल इंडिया के प्रमुख हेल्थकेयर डेस्टिनेशन के रूप म स्थापित करे म मदद मिलही।
ए मौका म मुख्यमंत्री के प्रमुख सचिव श्री सुबोध सिंह, उद्योग विभाग के सचिव श्री रजत कुमार, आवास अउ पर्यावरण विभाग के सचिव श्री अंकित आनंद, नवा रायपुर विकास प्राधिकरण के सीईओ श्री चंदन कुमार, बॉम्बे हॉस्पिटल ट्रस्ट के ट्रस्टी अउ चेयरमैन श्री भरत तापड़िया, सचिव श्री श्याम जी सहित ट्रस्ट अउ शासन के आने वरिष्ठ अधिकारी मन उपस्थित रिहिन।
