मुख्यमंत्री श्री भूपेश बघेल ह विशेष संरक्षित जनजाति उपर आधारित पुस्तिका ’जात्रा’ के करिन विमोचन

रायपुर, मुख्यमंत्री श्री भूपेश बघेल ह आज इहां विधानसभा स्थित अपन कार्यालय कक्ष म छत्तीसगढ़ के विशेष संरक्षित जनजाति उपर डॉ. सत्यजीत साहू के लिखे ’जात्रा’ पुस्तिका के विमोचन करिन। ये बेरा म मुख्यमंत्री के सलाहकार श्री प्रदीप शर्मा, बस्तर विकास प्राधिकरण के अध्यक्ष श्री लखेश्वर बघेल संग श्री सुनील शर्मा, श्री संतोष ठाकुर, श्री सूरज दुबे अऊ सुश्री भूमिसुता साहू घलोक उपस्थित रहिन।
मुख्यमंत्री श्री बघेल ल डॉ. साहू ह बताइस कि पुस्तिका म छत्तीसगढ़ म निवासरत विशेष पिछड़े जनजाति मन के संकेन्द्रण, उंखर जीवनशैली, रहन-सहन अऊ खान-पान के उल्लेख करे गए हे। एखर संगेच उंखर टीम ह शिविर के माध्यम ले ए जनजाति मन म स्वास्थ्य के प्रति जागरूकता पैदा करे के संग छोटे-मोटे बीमारी मन के प्रति भ्रांति मन ल दूर करे बर करे गए प्रयास के घलोक जानकारी देहे गए हे। उमन बताइन कि उंखर टीम सुदूर आदिवासी क्षेत्र मन म कैम्प लगाके राज्य सरकार कोति ले चलाए जात स्वास्थ्य योजना मन के जानकारी देहे के संग निःशुल्क स्वास्थ्य परीक्षण अउ दवइ घलोक मुहैया करावत हे। मुख्यमंत्री ह डॉ. साहू अउर ऊंखर टीम के सदस्य मन के काम ल सहरावत ओ मन ल बधाई अउर शुभकामना दीन।