रायपुर, राज्यपाल के सचिव श्री सोनमणि बोरा ह आज इहां राजभवन म गणतंत्र दिवस के अवसर म आयोजित होवइया स्वागत समारोह के संबंध म समीक्षा बैठक लीन। ये बेरा म कलेक्टर श्री एस. भारतीदासन, वरिष्ठ पुलिस अधीक्षक श्री शेख आरिफ हुसैन, आयुक्त नगर निगम रायपुर श्री शिव अनंत तायल अउर राजभवन के अधिकारी उपस्थित रहिन।
श्री बोरा ह राजभवन म आयोजित होवइया स्वागत समारोह के सुरक्षा व्यवस्था के समीक्षा करिन अऊ जरूरी हुकुम दीन। श्री बोरा ह कहिन कि ये कार्यक्रम म प्रोटोकाल के मुताबिक विशिष्ट जन मन ल आमंत्रित करे जाही। बैठक म तय करे गीस कि स्वागत समारोह के बेरा म अतिथि मन के आगमन अउर प्रवेश व्यवस्था पुलिस अधीक्षक अउर मुख्य सुरक्षा अधिकारी राजभवन कोति ले करे जाही। समारोह के नेवता बंटई अऊ स्वतंत्रता संग्राम सेनानी मन ल सम्मानपूर्वक राजभवन लाय अउर वापस ले जाय के व्यवस्था कलेक्टर रायपुर कोति ले करे जाही। श्री बोरा ह नगर निगम ल साफ-सफाई अऊ आन व्यवस्था के संबंध म जरूरी हुकुम दीन। समारोह के बेरा म सुरक्षा अउर कानून व्यवस्था कलेक्टर अउर पुलिस अधीक्षक कोति ले संघरा करे जाही। समारोह बर पुलिस बैंड के व्यवस्था मुख्य सुरक्षा अधिकारी, राजभवन कोति ले करे जाही। श्री बोरा ह कहिन कि कार्यक्रम म विशेष रूप ले प्रदेश के ख्यातिप्राप्त खिलाड़ी, आदिवासी समाज के प्रतिनिधि मन ल घलोक आमंत्रित करे जात हे। ये मा सिरिफ राजधानीच नही पूरा प्रदेश के विशिष्टजन कार्यक्रम म सामिल होहीं।
