रायपुर, 16 फरवरी 2024। शांति सरोवर म आज मुख्यमंत्री श्री विष्णु देव साय ब्रह्माभोजन बर ब्रह्माकुमारी बहिनी मन के पहुना बनिन। ए बेरा म मुख्यमंत्री श्री साय ह कहिन कि हर साल बड़ मया ले ब्रह्माकुमारी बहिनी मन विधानसभा के सबो सदस्य मन ल ब्रह्म भोजन कराथें। ये बड़ सुग्घर परंपरा ये। बहिनी मन के मया ले हम अभिभूत हन। राजधानी रायपुर के सड्डू स्थित प्रजापिता ब्रह्माकुमारी ईश्वरीय विश्वविद्यालय, शांति सरोवर कोति ले आयोजित स्नेह मिलन अउ ब्रह्मा भोजन कार्यक्रम म मुख्यमंत्री के संग विधानसभा अध्यक्ष डॉ. रमन सिंह, नेता प्रतिपक्ष डॉ. चरणदास महंत संग कैबिनेट मंत्रीगण अऊ सबो विधायकगण मन ह पवित्र ब्रह्मा भोजन के आनंद लीन।
कार्यक्रम म प्रजापिता ब्रह्माकुमारी ईश्वरीय विश्वविद्यालय के बहिनी मन ह मुख्यमंत्री संग विधानसभा के सबो सदस्य मन ल ब्रह्माकुमारी ईश्वरीय विश्वविद्यालय माउंट आबू आए के आग्रह करिन। मुख्यमंत्री श्री साय ह ए निमंत्रण ल स्वीकार करत उहां आए के सहमति दीन।
विधानसभा अध्यक्ष डॉ रमन सिंह ह कहिन कि शांति सरोवर आए ले शांति के अनुभूति होथे। मन म अपने आप ही अच्छा विचार आथे। उमन कहिन कि विधानसभा आत जात बेरा जइसनहे इहां ले गुजरथन, मन पवित्र हो जाथे। डॉ सिंह ह शांति सरोवर आमंत्रित करे अऊ पवित्र भोजन बर दीदि मन के आभार व्यक्त करिन।
ए मौका म विधानसभा के नेता प्रतिपक्ष डॉ चरण दास महंत ह घलोक संबोधित करिन। कार्यक्रम म शिक्षा मंत्री श्री बृजमोहन अग्रवाल, वन मंत्री श्री केदार कश्यप, विधायक श्री किरण सिंहदेव, श्री धरमलाल कौशिक संग विधायक गण, गणमान्य नागरिक सामिल होइन अऊ ब्रह्म भोजन ग्रहण करिन।
ब्रह्मा भोजन बर ब्रह्माकुमारी बहिनी के पहुना बनिन मुख्यमंत्री श्री साय
