बिलासपुर, उत्कृष्ट ब्राम्हण सामाजिक समग्र ब्राम्हण परिषद् छत्तीसगढ़ के ब्राम्हण मातृशक्ति परिषद् बिलासपुर ईकाई के बड़ महत्तम वाले बइठका काली जिलाध्यक्ष श्रीमती रमा दीवान के सरकंडा वाले घर म होइस। बइठका म जुरियाए जम्मो सहयोगी मन ह संघरा फैसला लेहे हें के बिलासपुर मातृशक्ति परिषद् ईकाई डहर ले अवइया 19 फरवरी 2026 के रतनपुर के श्री महामाया देवी मंदिर परिसर म ब्राम्हण बटुक मन के प्रदेश स्तरीय सामूहिक उपनयन संस्कार के आयोजन करे जाही।
बइठका के बारे म जानकारी देवत समग्र ब्राम्हण मातृशक्ति परिषद् बिलासपुर के जिला सचिव श्रीमती अंजू शर्मा ह बताइन के समग्र ब्राम्हण परिषद् छत्तीसगढ़ कोति ले पाछू चार बच्छर ले संगठन मुख्यालय रायपुर म शास्त्र सम्मत अउ पूरा विधि-विधान ले ब्राम्हण बटुक मन के उपनयन संस्कार कराए जाथे। अब अवइया 19 फरवरी के पहली पइत संगठन के बिलासपुर मातृशक्ति परिषद् ईकाई डहार ले रतनपुर के सिद्धपीठ श्री महामाया देवी मंदिर परिसर म ए आयोजन करे जात हे।
बइठका म मातृशक्ति परिषद् के प्रदेश सचिव श्रीमती निलिमा शर्मा अउ प्रदेश संगठन विस्तार प्रमुख श्रीमती राही दुबे ह आयोजन ला लेके जनेऊ अउ अलग-अलग संस्कार मन के महत्व ला ब्राम्हण परिवार, लइका अउ युवा मन तक पहुंचाय बर जोर दीन।
आयोजन के रुपरेखा ऊपर गोठ-बात करत उपस्थित सबो सहयोगी बहिनी मन ह आपसी तालमेल अउ सहयोग ले कार्यक्रम ला सफल बनाय बर अपन सहमति दीन। एकर संगे-संग अवइया जनवरी 2026 म उपनयन संस्कार के जरुरी तैयारी अउ व्यवस्था बर प्रदेश पदाधिकारी मन के संग बइठका करे के घलो निर्णय लेहे हें।
ए मौका म जिला संयोजिका श्रीमती विभा पांडेय, श्रीमती स्वाति दीवान, श्रीमती सीमा शर्मा, श्रीमती उर्वशी शर्मा, श्रीमती सरिता तिवारी, श्रीमती श्वेता शर्मा, श्रीमती प्रीति पांडेय, श्रीमती चंद्रकांता गौरहा, श्रीमती सीमा शर्मा, श्रीमती इंदु दीवान समेत बिलासपुर म रहइया संगठन के जम्मो सहयोगी बहिनी मन उपस्थित रिहिन।
ब्राम्हण मातृशक्ति परिषद ह अवइया 19 फरवरी के करही उपनयन संस्कार के आयोजन
