मुख्यमंत्री श्री विष्णु देव साय ह वर्चुअल रूप ले करिन शुभारंभ
कहिन – अब गांव वाले मन ल नइ जाना परय 100 किमी दूरिहा
माओवाद ले मुक्त भुइंया म रखे जात हे विकास के मजबूत नींव – मुख्यमंत्री श्री साय
बीजापुर, जिला के पामेड़, जेन कभू माओवादी मन के बटालियन नंबर-1 के गढ़ माने जात रहिस, आज उहां बैंक खुलत हे, कन्या आश्रम बनत हे अऊ मनखे खुले मन ले सुशासन शिविर म भाग लेवत हें। ये बदले बस्तर ये, आत्मविश्वास, विकास अऊ लोकतंत्र के चिन्हारी। मुख्यमंत्री श्री विष्णु देव साय ह आज बीजापुर जिला के सुदूरवर्ती अऊ पूर्व म माओवादी प्रभाव ले ग्रस्त पामेड़ क्षेत्र म छत्तीसगढ़ ग्रामीण बैंक के शाखा के शुभारंभ करत ये बात कहिन। मुख्यमंत्री श्री साय ह एला विकास अऊ विश्वास के नवा बिहान बतात कहिन के अब गांव वाले मन ल बैंकिंग सेव बर 100 किलोमीटर दूरिहा आवापल्ली नइ जाना परय। ये पहल सरकार के सुशासन अऊ समावेशी विकास के विजन ल दर्शाथे।
मुख्यमंत्री ह कहिन के इहां बैंक शाखा खुले ले पामेड़ अऊ आसपास के 50 गांव मन ल सीधा लाभ मिलही, जहां अब खाता खोले, पइसा निकाले अऊ महतारी वंदन योजना जइसे योजना मन के राशि लेहे म सुविधा होही। उमन विशेष रूप ले माता-बहिनी मन ल आश्वस्त करिन के अब ओ मन ल योजना के राशि बर लंबा यात्रा नइ करना परय। मुख्यमंत्री ह ए मौका म पामेड़ म 50-सीटर आदिवासी कन्या आश्रम के घलोक लोकार्पण करिन, जेकर लागत 1.62 करोड़ रुपिया हे। उमन कहिन के कन्या आश्रम अवइया समय म बस्तर के बेटी मन ल शिक्षा के मुख्यधारा ले जोड़के नवा नेतृत्व के रूप म उभारही।
मुख्यमंत्री ह कहिन के पामेड़ म अब पोषण पुनर्वास केंद्र के स्थापना करे जात हे, ताकि आसपास के कुपोषित लइका मन ल इलाज बर भटकना झन परय। उमन गांव वाले मन ले आग्रह करिन के ओ मन लइका मन ल समय म पोषण पुनर्वास केंद्र म लावयं अऊ स्वास्थ्य लाभ लेवयं।
मुख्यमंत्री श्री साय ह कहिन के तालपेरू नदी म धर्मावरम ब्रिज के निर्माण तेजी ले चलत हे, जेखर से अब तेलंगाना के चेरला होके 200 किलोमीटर लंबा सफर तय करके बीजापुर जाय के बाध्यता खतम हो जाही। ये पुल न केवल पामेड़ ल जोड़ही, भलुक क्षेत्रीय विकास के मुख्य द्वार घलोक बनही। मुख्यमंत्री श्री साय ह बताइस के आवागमन के सुविधा बढ़ात सरकार ह पामेड़ ले बीजापुर के बीच सीधा बस सेवा शुरू कर देहे हे। मुख्यमंत्री श्री साय ह कहिन के अब बिहनिया जाके संझा लहुटना संभव हो गए हे। मनखे मन के दिनचर्या सरल हो गए हे अऊ व्यापार-सेवा गतिविधि तेज़ी ले बढ़े हे।
ए मौका म सुशासन तिहार के तहत समाधान शिविर के घलोक आयोजन करे गीस, जेमां क्षेत्रीय जनसमस्या मन के जल्दी निराकरण करे गीस। मुख्यमंत्री ह कहिन के ये अभियान छत्तीसगढ़ म मनखे मन ल ऊंखर द्वार म प्रशासन देहे के हमर प्रतिबद्धता के प्रमाण हे। मुख्यमंत्री ह ये स्पष्ट करिन के सरकार के संकल्प मार्च 2026 तक माओवाद ल पूरा खतम करना हे। उमन कहिन के हम विकास के यात्रा ल रुकन नइ दन।
पामेड़ म ग्रामीण बैंक के शाखा के शुभारंभ कार्यक्रम अऊ उहां आयोजित समाधान शिविर म पूर्व मंत्री श्री महेश गागड़ा, जिला पंचायत अध्यक्ष श्रीमती जानकी कोरसा, कलेक्टर श्री संबित मिश्रा, पुलिस अधीक्षक डॉ. जितेन्द्र कुमार यादव संग कई जनप्रतिनिधि, अधिकारी अऊ बड़ी संख्या म ग्रामीण उपस्थित रहिन।
बीजापुर के पामेड़ म खुलिस ग्रामीण बैंक के शाखा
