रायपुर, 11 जनवरी 2024। धार्मिक न्यास अऊ धर्मस्व, पर्यटन अऊ संस्कृति मंत्री श्री बृजमोहन अग्रवाल ह अयोध्या म श्री रामलला प्राण प्रतिष्ठा के पावन अवसर म 22 जनवरी के छत्तीसगढ़ के सबो शासकीय अऊ गैर शासकीय स्कूल, कॉलेज म अवकाश के घोषणा करिन। ये घोषणा मंत्री श्री बृजमोहन अग्रवाल ह आज पत्रकार मन ले चर्चा के समय करिन।
श्री अग्रवाल ह पत्रकार मन ले चर्चा करत कहिन कि प्रधानमंत्री श्री नरेंद्र मोदी जी के गारंटी के तहत छत्तीसगढ़ के श्रद्धालु मन ल ‘‘श्री रामलला दर्शन योजना’’ के तहत अयोध्या ले जाए जाही। एखर बर छत्तीसगढ़ सरकार इंडियन रेलवे एण्ड टूरिज्म कार्पोरेशन ले अनुबंध करके एक ट्रेन बुक करही जेन हफ्ता म एक दिन चलही। जेमां एक पइत म 850 ले 1000 श्रद्धालु अयोध्या म प्रभु श्री राम के दर्शन करे जा सकही। ट्रेन म सियान अऊ दिव्यांग मन के विशेष ध्यान रखे जाही। ऊंखर संग एक सहायक ल जाय के अनुमति होही। संगेच यात्री मन के स्वास्थ्य सुविधा बर डॉक्टर घलोक तैनात करे जाही। श्रद्धालु मन के रहे अऊ खाए के व्यवस्था शासन कोति ले करे जाही।
श्री अग्रवाल ह कहिन कि अयोध्या म श्री रामलला के प्राण प्रतिष्ठा समारोह 22 जनवरी के ऐतिहासिक पल ल यादगार बनाए बर छत्तीसगढ़ के सबो जिला मन अऊ ब्लॉक स्तर म प्रमुख मंदिर म भिनसरहा आरती, पूजा अऊ भजन के आयोजन होही, उहें ये दिन संझा नदी या तालाब के किनारे गंगा आरती के आयोजन करे जाए अऊ रोशनी करे जाही।
22 जनवरी के प्रदेश के स्कूल कॉलेज म रइही छुट्टी: शिक्षा मंत्री श्री बृजमोहन अग्रवाल
