रायपुर/16/05/2020/ प्रदेश म होवत बेमौसम बरसा अऊ करा गिरे ले रबी फसल अऊ सब्जी के खेती ल होए नुकसान बर किसान मन ल अतिशीघ्र मुआवजा देहे के मांग विधायक अउ पूर्व मंत्री बृजमोहन अग्रवाल ह मुख्यमंत्री भुपेश बघेल ले करे हें।
बृजमोहन अग्रवाल ह कहिन के बीते कुछ दिन ले प्रदेश के जशपुर, कोरिया,सरगुजा, महासमुंद, कवर्धा, बेमेतरा, धमतरी, बालोद, कोरबा, दुर्ग, कांकेर, रायगढ़, जगदलपुर, रायपुर संग कई जिला मन म हवा-गरेरा के संग असमय बरसात अउ ओला वृष्टि होए हे। ये वाले क्रम सरलग चलत हे। एखर सेती बहुत अकन किसान मन के धान अउ दलहन-तिलहन के फसल खराब हो गए हे। सब्जि अउ फल के खेती करइया किसान मन ल घलोक बड़का नुकसान होय हे। ओ मन गंभीर आर्थिक संकट म फस गे हें। ये किसान मन खेती बर करजा तको लेहे हें, अइसन म अब उंखर स्थिति करजा चुकाए के बिल्कुल नइ हे।
उमन आगू कहिन के किसान मन ह सरकार ल 2500 रुपिया प्रति क्विंटल के हिसाब ले जऊन धान बेचें हे ओमा ओ मन ल प्रति क्विंटल 1815 अऊ 1835 ही मिले हे। अंतर के राशि अभी तक ओ मन ल नइ मिले हे। जबकि सरकार ह फरवरी के बजट सत्र ले 5000 करोड़ के राशि स्वीकृत कर डारे हे। आज किसान मन के समय खराब हे अइसन म सरकार ह ये राशि घलोक नइ देहे हे, तेकर सेती उंखर हालत अऊ जादा खराब हो गए हे। ये राशि घलोक किसान मन के खाता म बिना देरी करे जमा करना चाही।
बृजमोहन ह राज्य सरकार ले आग्रह करत कहिन के बेमौसम बरसात अऊ ओलावृष्टि ले प्रभावित किसान मन के खेती के नुकसान के सर्वे कराके पीड़ित किसान मन ल अतिशीघ्र मुआवजा देहे जाय।
