महाराजबंद तालाब के तीर के चौक के नामकरण होही अटल जी के नाम म, लगाए जाही अटल जी के भव्य प्रतिमा
रायपुर, 25 दिसम्बर 2023। पूर्व प्रधानमंत्री, भारत रत्न स्वर्गीय श्री अटल बिहारी वाजपेयी एक देशभक्त अऊ सर्वमान्य जनप्रतिनिधि रहिन। उमन अपन प्रधानमंत्री कार्यकाल म सर्वसाधारण के विकास खातिर ध्यान दीन, उंखर पूरा जीवन देश बर समर्पित रहिस। उमन शासन-प्रशासन म शुचिता लाय के प्रयास करिन। ये बात पूर्व प्रधानमंत्री श्री अटल बिहारी वाजपेयी के जयंती सुशासन दिवस के अवसर म राजधानी रायपुर के महामाया मंदिर वार्ड म महाराजबंद तालाब के तीर आयोजित कार्यक्रम ल सम्बोधित करत कैबिनेट मंत्री श्री बृजमोहन अग्रवाल ह कहिन। श्री अग्रवाल ह ये मौका म कार्यक्रम स्थल म स्वर्गीय श्री वाजपेयी के फोटू उपर माला चढ़ा के श्रद्धांजलि दीन। ये मौका म उमन महाराजबंद तालाब तीर स्थित चौक के नामकरण अटल जी के नाम म अटल चौक करे के घोषणा करिन संगेच अटल जी के भव्य प्रतिमा लगाए के घोषणा घलोक करिन।
कैबिनेट मंत्री श्री अग्रवाल ह कहिन कि अभी हाल प्रधानमंत्री श्री नरेन्द्र मोदी ह जेन प्रकार ले कुशल नेतृत्व ले पूरा विश्व म अपन पहिचान बनाय हे, वइसनहे पूर्व प्रधानमंत्री स्वर्गीय श्री वाजपेयी ह अपन नेतृत्व क्षमता ले विश्व पटल म अपन गहिर छाप छोड़े हें । उमन सुशासन दिवस म पूर्व प्रधानमंत्री श्री वाजपेयी के पुण्य स्मरण करत कहिन कि उमन देश के विकास म हरसंभव योगदान दीीन। उमन पक्का सकड़ के जाल बिछाइन। प्रधानमंत्री ग्रामीण सड़क योजना के तहत गांव-गांव मन पक्की सड़क ले जुड़ गे। लइका मन के शिक्षा ल प्राथमिकता देवत उमन सर्व शिक्षा अभियान के शुरूआत करिन। ऊंखर कार्यकाल के समय ही मोबाईल नेटवर्क पूरा देश म फैलिस।
श्री अग्रवाल ह कार्यक्रम म उपस्थित जनप्रतिनिधि, आमजन अऊ स्कूल-कॉलेज के लइका मन ल सुशासन दिवस के शपथ देवाइन। उमन कार्यक्रम म निबंध, भाषण, कविता अऊ पोस्टर प्रतियोगिता म भाग लेवईया शहीद संजय यादव शासकीय उच्चतर माध्यमिक विद्यालय संजय नगर, डॉ. राधा बाई कॉलेज मठपारा, जे.आर. दानी शासकीय कन्या उच्चतर माध्यमिक विद्यालय अऊ मठपारा स्कूल के विजेता लइका मन ल पुरस्कृत करिन। उमन लइका मन कोति ले लगाए गए पोस्टर प्रदर्शनी के अवलोकन घलोक करिन। ये बेरा म नगर निगम के पार्षद श्रीमती मीनल चौबे, श्री मृत्युंजय दुबे, श्रीमती सरिता वर्मा, श्री मनोज वर्मा, श्रीमती सावित्री साहू, श्रीमती सीमा कंदोई संग आन जनप्रतिनिधि उपस्थित रहिन।
