स्कूल म लइका मन ल शिक्षा के संग संस्कार घलोक मिलय: शिक्षा मंत्री श्री अग्रवाल

अंबिकापुर, 4 फरवरी 2024। स्कूल शिक्षा मंत्री श्री बृजमोहन अग्रवाल ह कहिन हे कि स्कूल केवल शिक्षा के केंद्र ही झन रहय भलुक समर्पण अऊ संस्कार के केंद्र घलोक बनय। उमन कहिन कि राज्य शासन के शिक्षा के प्रति सर्वोच्च प्राथमिकता हे। लइका मन के बेहतर भविष्य बर राज्य म न्यू एजुकेशन पॉलिसी उपर काम करे जात हे। उमन कहिन कि आगामी सत्र ले स्कूल मन म पहिली पीरियड म योग अऊ प्राणायाम के संग ही नैतिक शिक्षा घलोक चालू करे के योजना हे। श्री अग्रवाल आज अंबिकापुर म एक निजी स्कूल के शुभारंभ अवसर म आयोजित कार्यक्रम ल सम्बोधित करत रहिन।
स्कूल शिक्षा मंत्री श्री अग्रवाल ह कहिन कि स्कूल के उद्देश्य केवल ज्ञान प्रदान करना ही नइ हे, भलुक छात्र मन ल जीवन म सफल होए बर जरूरी सबो कौशल प्रदान करना घलोक हे। अभी हाल समय म शिक्षा के संग हमला व्यवहारिक अऊ तकनीकी ज्ञान म दक्ष होना घलोक जरूरी हे। स्कूली शिक्षा के समय ही लइका मन नैतिक मूल्य मन अऊ सामाजिक संस्कार मन ल सीखथें, जेन ओ मन ल बेहतर नागरिक बनाथे। उमन कहिन कि शिक्षा के व्यावसायीकरण करे के बजाय हमला प्रतिभा मन ल आगू लाय के प्रयास करना चाही।
कार्यक्रम म कृषि मंत्री श्री रामविचार नेताम ह स्कूली लइका मन ल शिक्षा अऊ ऊंखर बेहतर भविष्य बर बधाई अऊ शुभकामना दीन। ए मौका म अंबिकापुर विधायक श्री राजेश अग्रवाल संग स्थानीय जनप्रतिनिधि, स्कूल प्रबंधन अऊ शिक्षक, स्कूली लइका अउर ऊंखर परिजन उपस्थित रहिन।