बलौदाबाजार, 13 जुलाई 2020। कलेक्टर सुनील कुमार जैन ह जिला म रहवईया मनखे मन ल सौगात देत जिला अस्पताल म नवा स्थापित कोरोना कोविड टेस्ट सेंटर के शुभारंभ करिन। कोविड-19 के खिलाफ चलत जंग के बीच जिला हास्पिटल म कोविड 19 टेस्ट प्रक्रिया शुरू हो गीस। राज्य सरकार कोति ले कोविड-19 जांच बर नवा आधुनिकतम मशीन जिला हॉस्पिटल ल देहे गए हे। अब जिला के निवासी मन के कोविड-19 जांच सैम्पल ल रायपुर नइ भेजना परय। बलौदाबाजार म ही कोरोना के टेस्टिंग के सुविधा अब उपलब्ध होही। बलौदाबाजार सीएमएचओ डॉ.के.आर सोनवानी ह बताइस के राज्य शासन कोति ले संदिग्ध मरीज मन के सेंपल लेके इहां जांच करे जाही। एकर पहिली एम्स रायपुर म आरटीपीसीआर के संग जांच होत रहिस। अब उही तकनीक म ट्रू नेट एंड टेस्ट कोविड-19 मशीन के संग जांच करे जाही। ये मा दू घंटा म रिजल्ट मिल जाही। एखर से मरीज मन के पहिचान के संग इलाज म सहायता मिलही। उमन बताइन के एक दिन म 16 ले 24 मनखे मन के जांच रिपोट आ जाही।
बलौदाबाजार जिला अस्पताल म कोरोना के होही नि:शुल्क जांच के सुविधा: बीएसएल 2 स्तर के लैब होइस स्थापित
