आप मन जानतेच हव के आज पूरा विश्व कोरोना वायरस के चपेट म हे। हमर देश घलव एकर से प्रभावित होगे हे। एकरे संग छत्तीसगढ़ के जम्मो जिला घलव म सावधानी बरते जात हे। इहि सब ल देखत केंद्र सरकार अउ राज्य सरकार ह अपन नागरिक के सुरक्षा के खातिर 21 दिन के पूरा लाक डाउन के आदेश देहे हवय |
सरकार अपन जनता के फिकर करत हे फेर भिलाई इस्पात संयंत्र (BSP) प्रबंधन अपन कर्मचारी मन के जान ल जोखिम म डार के प्रोडक्शन के काम ल जारी रखे हे। संयंत्र के भीतर भीड़ म कर्मचारी मन ल काम करे ल परत हे, जिहाँ वायरस के सम्भावना लगातार बने हे। खबर हे के प्लांट के भीतर कोनो भी प्रकार से सेनेटाइज नही करे गए हे, जे सबले बड़े खतरा हे। काबर के अभी के खबर के मुताबिक भिलाई म एक मनखे कोरोना पॉजिटिव पाय गए हे।
मजदूर नेता देवेंद्र कौशिक के कहना हे के बीएसपी के अधिकारी मन अपन आप ल सुरक्षित कर लेहे, फेर कर्मचारी अउ श्रमिक मन से लगातार काम कराय जात हे जेमा भीड़ हे, सोसल डिस्टेंसिंग नई हे। येकर से कोनो बड़े खतरा हो सकत हे। अईसे माहौल म जिला प्रशासन ल भिलाई इस्पात संयंत्र प्रबंधन के खिलाफ कड़क कार्यवाही करना चाही।
