रायपुर, मुख्यमंत्री श्री भूपेश बघेल ह अपन सरकार के चौथइया बजट पेस करे के पहिली युद्ध के विभीषिका ले आशंकित जम्मो संसार बर मंगल कामना करत यजुर्वेद के मंतर ‘ॐ विश्वानि देव सवितः दुरितानि परा सुव। यत्भद्रम् तत् नइ आसुव’ ले करिन।
1. उमन कहिन के ये मोर सौभाग्य ये कि भारत के आजादी के 75 वां सालगिरह के साल म मैं अपन सरकार के ये बजट पेस करत हंव। मोला संतोष हे कि बीते तीन बछर म हमर सरकार ह आजादी के नायक राष्ट्रपिता महात्मा गांधी के सपना ल पूरा करे के दिशा म सार्थक कदम उठाये हे। बापू के सुरता मन ल संजोए अउ ऊंखर विचार मन उपर आधारित विकास के रद्दा ल देखे-गुने बर नवा रायपुर म सेवा ग्राम के स्थापना करे जाही। ये परियोजना के अनुमानित लागत 100 करोड़ हे। वित्तीय साल 2022-23 म ये व्यय बर नवा मद म 5 करोड़ के प्रावधान हे।
2. हमन अपन विरासत अऊ विकास योजना मन ल लेके जेन कहे रहेन, ओला करके घलोक देखाय हन। जेखर सेती ग्रामीण अऊ वनांचल मन म रोजगार के नवा अवसर बने हे अऊ हमला ग्राम केन्द्रित नवा अर्थव्यवस्था स्थापित करे म सफलता मिले हे। विकास के ये ‘‘छत्तीसगढ़ मॉडल’’ ल राष्ट्रीय स्तर म पहिचान मिले हे।
3. हमर सरकार कोति ले पहिली साल म ही 17 लाख 96 हजार किसान मन के 8 हजार 744 करोड़ रूपिया के कृषि ऋण माफ करे गीस। किसान मन ले धान के खरीदी 2500 रूपिया प्रति कुंटल के दर म करे गीस। खरीफ 2018 के धान बर 15 लाख 77 हजार किसान मन ल 6 हजार 22 करोड़ रूपिया के बोनस राशि के तुरंत भुगतान करे गीस।
4. बस्तर के विकास के नवा अध्याय शुरू करत संभाग के जिला मन म नारंगी वन क्षेत्र म ले 30 हजार 439 हेक्टेयर जमीन राजस्व मद म वापस दर्ज करे गीस। हमार ये कदम ले उहां के निवासी मन ल कृषि अउ व्यवसाय बर पट्टा देहे जा सकही। नवा उद्योग मन के स्थापना करे जा सकही। शासकीय भवन के निर्माण, सड़क अउ रेलमार्ग के विकास अऊ आन गतिविधि मन बर घलोक सरलता ले जमीन उपलब्ध हो सकही।
आगू के कड़ी ल येदे कड़ी म पढ़व
माननीय मुख्यमंत्री श्री भूपेश बघेल के बजट भाषण
