बुधनी ह बिहान ले जुड़ के बनिस आत्मनिर्भर, बीसी सखी के रूप म करिस दस करोड़ के लेनदेन

CHHATTISGARHI NEWS: कोण्डागांव, राष्ट्रीय ग्रामीण आजीविका मिशन मने बिहान ह ग्रामीण महिला मन ला स्व-सहायता समूह ले जोड़ के न सिरिफ आर्थिक रूप से आत्मनिर्भर बनावत हे, बल्कि परिवार अउ समाज म ओमन ला एक अलग पहचान अउ प्रतिष्ठा घलो देवत हे। एखर एक बढ़िया उदाहरण कोण्डागांव जिला के मर्दापाल क्षेत्र के लखापुरी गांव के श्रीमती बुधनी धारवईया हे।
वर्ष 2019 म जागृति स्व-सहायता समूह ले जुड़े के बाद ओ ह बीसी सखी के रूप म काम करे शुरू करिस। ओ ह ग्रामीण मन ला गांवे म बैंक ले राशि आहरण, बीमा, पेंशन सहित आन-आन शासकीय योजना के बैंकिंग सुविधा देवत हे। अब तक ओ ह लगभग दस करोड़ रुपिया के लेनदेन कर चुके हे। बीसी सखी के काम ले ओला कमीशन के रूप म हर महिना औसतन आठ ले दस हजार रुपिया के आय मिलत हे।
श्रीमती बुधनी बताइस के पहिली ओखर परिवार के आजीविका कपड़ा सिलाई के काम म निर्भर रहिस। बिहान ले जुड़े के बाद ओला आय के उपरहा साधन अउ आत्मविश्वास के संग आगे बढ़े के अवसर मिलिस। अपन आय के उपयोग ओ ह परिवार के जरूरत के संग बेटी मन के भविष्य ला सुरक्षित करे बर घलो करत हे। ओ ह अपन दुनों बेटी के नाम सुकन्या समृद्धि योजना के तहत हर महीना एक-एक हजार रुपिया नियमित रूप से जमा करत हे।
बीसी सखी के रूप म बुधनी के सेवा ले आसपास के ग्रामीण परिवार मन ला घलो सुविधा मिलत हे। ग्रामीण मन ला बैंक जाए के जरूरत कम परे हे। बुधनी ह ये सफलता बर प्रधानमंत्री श्री नरेन्द्र मोदी, मुख्यमंत्री श्री विष्णुदेव साय सहित शासन-प्रशासन के प्रति आभार व्यक्त करे हे।