बिलासपुर, 22 दिसम्बर 2020। तारबाहर थाना इलाका म फ्लैट देवाय के नाम म होइस 54 लाख ले ज्यादा के धोखाधड़ी मामला म पुलिस ल बड़का सफलता मिले हे। पुलिस ह एक साल ले फरार मालिक राजेश सेठ ल उत्तर प्रदेश म घेराबंदी कर के धर दबोचीस हे। विनायका हाईट्स के मालिक ह फ्लैट देवाय के एवज म एक मनखे ले 27 लाख अऊ दूसर ले 27 लाख 50 हजार रुपिया के बैंक ले लोन पास कराय अऊ धोखाधड़ी के घटना ल अंजाम देहे रिहिस। मामला के जांच के दौरान पुलिस ल मुखबिर ले सूचना मिले म आरोपी राजेश सेठ उत्तर प्रदेश के गाजियाबाद म छुपे रिहिस। तारबाहर पुलिस टीम गाजियाबाद रवाना करे गिस। जिहा पहली ले ही साइबर सेल के टीम मौजूद रिहिस। टीम ह 72 घंटा लगातार रैकी करके आरोपी ल नोएडा ले घेराबंदी करके पकड़े गिस। पूछताछ म अपन जुर्म स्वीकार कर लेहे हे। ओखर पास ले एक कार जब्त करे गए हे। आरोपी ल गिरफ्तार करके न्यायिक रिमाण्ड म जेल भेज देहे गए हे।
गुरतुर गोठ बर- भीषम वर्मा