मल्चिंग विधि ले करे गए खेती ले खीरा के बंपर पैदावार, अब तक 38 कुंटल के बिक्री
अम्बिकापुर, बतौली जनपद के आदर्श गोठान मंगारी म चम्पा स्व सहायता समूह के महिला मन ह खीरा के खेती करके ओखर बिक्री ले 90 हजार 450 रुपए शुद्ध मुनाफा कमाए हें। गोठान म मल्चिंग विधि ले करे गए खेती ले खीरा के बंपर पैदावार होए हे जेखर से महिला मन ह अब तक 38 क्विंटल खीरा करीब 1 लाख 2 हजार रूपिया के बेचे हें।
उप संचालक उद्यानिकी श्री एनएस लावत्रे ह बताइस कि मंगारी गोठान म बाड़ी विकास के तहत चम्पा स्व सहायता समूह के महिला मन ल ड्रिप इरिगेशन अऊ मल्चिंग विधि ले आलमगीर अऊ क्रिष वेरायटी के खीरा के खेती बर जरूरी तकनीकी मार्गदर्शन उद्यान विभाग अऊ वैज्ञानिक डॉ प्रशांत शर्मा कोति ले दे गीस। गोठान म करीब 75 डिसमिल म खीरा के खेती जुलाई महिना म करे गीस। कम समय म ही अच्छा उत्पादन शुरू होए ले आस-पास के बाजार म मांग बाढ़ीस जेखर से तेजी ले बिक्री बाढ़ीस।
जानबा हे कि कलेक्टर श्री कुन्दन कुमार के मार्गदर्शन अऊ जिला पंचायत सीईओ श्री विनय कुमार लंगेह के सियानी म जिला के गोठन मन ल आजीविका केंद्र के रूप म विकसित करे जात हे। गोठान म सब्जी के खेती संग आन आयमूलक गतिविधि सरलग संचालित होवत हे। कई गोठान मन म हल्दी अऊ शकरकन्द के खेती घलोक करे जात हे। रीपा के तहत औद्योगिक इकाइ मन के स्थापना करे जात हे जेमां गोनायल, बोरा निर्माण, ब्रेड निर्माण, कच्ची घानी आदि काम चलत हे।
