रायपुर, 5 जुलाई 2020। छत्तीसगढ़ म रविवार ले अंतरजिला परिवहन सेवा शुरू होय हे. लॉकडाउन के बेरा 104 दिन तक बस मन के पहिया थमें के बाद आज ले प्रमुख रूट मन म 10 फीसदी बस चलाये जाही. बस ऑपरेटर के प्रदेश उपाध्यक्ष अनवर अली ह बताइस कि हमन परिवहन मंत्री, मुख्यमंत्री अउ परिवहन आयुक्त ले मुलाकात करे रहेन. हमर मांग मन ल पूरा करे गे हे. हालांकि, किराया म बढ़ोत्तरी के बात म सहमति नई बन पाइस , ये मुद्दा म कैबिनेट बैठक म चर्चा करे के बाद ही निर्णय ले जाही. ओ मन बताइस कि हमन ल 10 फीसदी गाड़ी मन के संचालन करे बर कहे हे, जेखर बाद हमन आज बिहनिया ले कुछ बस मन के संचालन करे हन. मंगलवार बिहनिया ले बस मन के संचालन सरगुजा अउ बस्तर संभाग ले घलो चालू हो जाही. यात्री मन ल बस म चढ़े ले पहली अउ उतरे के बाद सैनिटाइज करे जाही. गाड़ी मन म हर यात्री बर मास्क अनिवार्य रही. परिवहन विभाग के अधिकारी मन ह आपरेटर मन ल बस परिचालन के बेरा सोशल डिस्टेंसिंग के पालन करे के निर्देश दे हे.
104 दिन के लंबा अंतराल के बाद फेर शुरू होइस बस मन के परिचालन, लोगन मन ल मिलिस राहत
