बूता म लापरवाही बरते के सेति मुखिया प्रहरी संग तीन प्रहरी निलंबित : गृह अउ जेल मंत्री श्री ताम्रध्वज साहू के निर्देश म तुरते —ताही कार्रवाई

रइपुर, 07 मई 2021 शनिच्चर। महासमुंद जिला जेल ले भीथिया फांदके 5 कैदी मन के फरार होए के घटना म गृह अउ जेल मंत्री श्री ताम्रध्वज साहू ह जेल प्रशासन के बड़का अधिकारी मन ल लउहे कार्रवाई के हुकुम देहे रिहिन । तेने म बूता बर घोर लापरवाही बरते के सेति मुख्य प्रहरी के संगे—संग तीन झिन प्रहरी तुरते ले निलंबित कर देहे गइन।
मुख्यालय जेल अउ सुधारात्मक सेवाएं छत्तीसगढ़ रायपुर कोति ले जारी निलंबन पाती म कहे हे कि सी.सी.टी.व्ही फूटेज अउ उपजे परिस्थिति के आधार म 6 मई 2021 के मंझनिया 2 बजे ले संझा 6 बजे तक तैनात मुखिया प्रहरी श्री राजकुमार त्रिपाठी अउ प्रहरी श्री गणेश कुमार एक्का, श्री भरतलाल सेन अउ श्री सुखीराम कोसले ल बूता म घोर लापरवाही बरते के सेति तुरते प्रभाव ले निलंबित करे गे हे।
जेल मुख्यालय ले जारी पाती म कहे गे हवय कि जिला जेल महासमुंद म परिरूद्ध पांच झिन विचाराधीन बंदी धनसाय उमर 33 बछर, डमरूधर उमर 24 बछर, राहुल उमर 22 बछर, दौलत उमर 23 बछर अउ करन उमर 21 बछर आने— आने धारा मन के तहत जेल म परिरूद्ध रिहिने। ये पांचों कैदी लगभग मंझनिया 3 ले 3.30 बजे बैरक नम्बर 5 ले लगे भीथिया म दू झिन बंदी मन के उपर एक बंदी चढ़के टयूब राड के पट्टी के सहारा एक ठिन गमछा अउ एक ठिन शॉल ल जोड़के हुक ल सोलर फ्रेंसिंग वायर के क्लेम्प म फंसाइन अउ ओकरे सहारा पांचों झिन बंदी ओसरी —पारी चढ़के जेल ले फरार हो गे। फरार पांच बंदी मन म ले तीन झिन बंदी डमरूधर, दौलत अउ करन ल फेर गिरफ्तार कर ले हें। दू झिन बंदी धनसाय अउ राहुल के तलाश चलत हावय।