शौचालय निर्माण म अनियमितता पाए म गिरवरगंज के सचिव निलंबित

सूरजपुर, स्वच्छ भारत मिशन के तहत ग्राम पंचायत गिरवरगंज जनपद पंचायत सूरजपुर म व्यक्तिगत शौचालय निर्माण म व्यापक अनियमितता संबंधी शिकायत आए रहिस। ए बात म जिला स्तरीय जांच समिति ह जांच करिस त वित्तीय अनियमितता पाये गीस। करमूराम पिता धनेश्वर राम ल ग्राम पंचायत गिरवरगंज ले पलायन बता के ओखर जगा म मुरली पिता भैयालाल के नाम ले शौचालय निर्माण कराए गए रहिस। त्रिवेणी पिता सहदेव के नाम ले स्वीकृत शौचालय ल हितग्राही खुदे निर्माण कर डरे रहिस तभो ले ओ राशि ल आहरण करके हितग्राही ल भुगतान नइ करे गए रहिस। ए सब सही पाए म श्रीमती पुष्पा जायसवाल पंचायत सचिव ग्राम पंचायत देवीपुर, (तत्कालीन सचिव ग्राम पंचायत गिरवरगंज) जनपद पंचायत सुरजपुर ल छ.ग. पंचायत सेवा (अनुशासन अऊ अपील) नियम 1999 के नियम 4 के तहत् तुरंत प्रभाव ले निलंबित कर देहे गीस।