मुख्यमंत्री श्री भूपेश बघेल ह सी-मार्ट के लोगो के करिन विमोचन

रायपुर, मुख्यमंत्री श्री भूपेश बघेल ह आज विधानसभा परिसर म सी-मार्ट के लोगो के विमोचन करिन।
ये लोगो म कारीगर, बुनकर, शिल्पकार, कुम्हार अऊ आन पारंपरिक कलाकार मन के काम मन ल एक उत्सव के जइसे प्रतिबिंबित करे गए हे। सी-मार्ट कई ठन उद्यमी मन के उत्पाद ल एके छत के नीचे विक्रय के व्यवस्था सुनिश्चित करही। लोगो म साल रुख के तरी आदिवासी मन के पारंपरिक हाट-बाजार ल प्रदर्शित करे गए हे,  भारतीय गांव अऊ कस्बा मन म मुक्ताकाश बाजार ही स्थानीय मनखे मन के विनिमय केंद्र होथे। धान के बाली मन के माध्यम ले छत्तीसगढ़ म चावल उत्पादन के प्रचुरता ऊपर प्रकाश डाले गए हे। छत्तीसगढ़ प्रदेश भारत के तीन प्रमुख धान उत्पादक राज्य मन म ले एक हे। मटमैला मैरून अऊ हरियर रंग के माध्यम ले छत्तीसगढ़ के आदिवासी महिला मन के पारंपरिक परिधान ल दर्शाए गए हे।
जनबा हे कि मुख्यमंत्री श्री भूपेश बघेल ह ग्रामीण अर्थव्यवस्था के तेजी ले विकास बर गांव मन म तियार उत्पाद ल शहर के मार्केट ले जोड़े के नवा पहल करे हें। एखर बर मुख्यमंत्री श्री बघेल ह राज्य सरकार के कई ठन विभाग मन के योजना के अंतर्गत महिला स्व सहायता समूह, शिल्पि, बुनकर, दस्तकार, कुम्भकार या आन पारंपरिक अउ कुटीर उद्योग मन बनाए उत्पाद मन के समुचित मूल्य सुनिश्चित करे बर इंकर व्यावसायिक ढंग ले मार्केटिंग बर शहर म आधुनिक शोरूम के जइसे सी-मार्ट स्थापित करे के हुकुम अधिकारी मन ल देहे हें।
सी-मार्ट के स्थापना ले ए सबो वर्ग के उद्यमी मन ल लाभ मिल सकही। एखर बर पहिली चरण म सबो जिला मुख्यालय म नगर निगम के स्थिति म 8 ले 10 हजार वर्गफुट अऊ नगर पालिका के स्थिति म 6 ले 8 हजार वर्गफुट म आधुनिक शो रूम के जइसे सी मार्ट के स्थापना के तैयारी करे जात हे।