रायपुर GG Digital News Desk, बिजली बिल के चिंता करइया मन बर सरकार ह बड़का राहत के खबर लाए हे. मुख्यमंत्री विष्णु देव साय के आगुवई मा आज मंत्रालय महानदी भवन मा कैबिनेट के बैठक होइस, जेमा सबले बड़े फैसला बिजली बिल ला लेके लेहे गे हे.
सरकार ह ‘मुख्यमंत्री ऊर्जा राहत जन अभियान’ (M-URJA) के सुरुआत करे हे, जेन 1 दिसम्बर 2025 ले लागू हो गे हे. एखर तहत अब 100 यूनिट न ही, बल्कि 200 यूनिट तक बिजली जलाय मा बिल आधा (50% छूट) लगही. कुल मिलाके 42 लाख उपभोक्ता मन ला बिजली बिल मा सीधा फायदा मिलही.
400 यूनिट वाला मन ला घलो फायदा: जेकर घर मा 400 यूनिट तक बिजली खपत हे, ओमन ला घलो अवइया एक साल तक 200 यूनिट मा 50% के छूट मिलही. एखर उदेस्य ये हे के एक साल के भीतर लोगन मन अपने घर मा सोलर प्लांट लगवा लेवंय.
सोलर पैनल मा सब्सिडी: पीएम सूर्यघर मुफ्त बिजली योजना के तहत राज सरकार घलो पइसा देवत हे. 1 किलोवॉट के सोलर प्लांट मा 15 हजार अउ 2 किलोवॉट ले जादा मा 30 हजार रुपिया के अलग ले सब्सिडी मिलही. सरकार के कहना हे के अब जनता ला ‘हाफ बिजली ले फ्री बिजली’ कोति जाना हे.
बाकी बड़े फैसला: बिजली के संगे-संग सरकार ह लोकल (स्थानीय) उद्योग मन ला बढ़ावा देहे खातिर ‘भण्डार क्रय नियम’ मा बदलाव करे हे, जेकर से खरीदी मा आसानी होही. एकर अलावा ‘ईज ऑफ डूइंग बिजनेस’ ला बढ़ाए बर दुकान अउ निजी विश्वविद्यालय नियम मा घलो संसोधन ला मंजूरी देहे गए हे.
