रायगढ़, 3 जुलाई 2020। रायगढ़ जिला के कोतरा थाना इलाका के किरोड़ीमल नगर म दिनदहाड़े लूट के घटना होय हे. दू नकाबपोश बाइक सवार मन ह फिल्मी स्टाइल म गोली मार के एक कैश वैन ल लूट ले हे. बदमाश मन ह कैश वैन के ड्राइवर के सर म गोली मारे हे, जेखर ले ओखर मउका म ही मउत होगे, जबकि गार्ड के हालत गंभीर हे, जोन ल निजी अस्पताल म भर्ती कराये गे हे. हालांकि लूट कतना के होय हे, एखर अभी आधिकारिक पुष्टि नई होय हे, लेकिन कुछ लोगन मन के कहना हे कि करीब 13 लाख के लूट होय हे.
ये घटना के बाद पूरा किरोड़मल नगर म दहशत के माहौल हे. ये घटना के सूचना मिलत ही पुलिस मउका म पहुंच गे हे. कोतरा रोड थाना प्रभारी युवराज तिवारी मौजूद हे. शहर के चारों ओर नाकेबंदी कर दे गे हे. जानकारी के अनुसार घटना करीब 2 बजे के हे. दू नकाबपोश बाइक सवार व्यक्ति जोन नीला कलर के ट्रैक सूट पहिने रहिस. किरोड़ीमल नगर आजाद चौक थाना कोतरा रोड रायगढ़ स्थित एटीएम म आके एटीएम वैन के ड्राइवर के सर म गोली मार दिस. जेखर घटना स्थल म ही मउत होगे. वहीं गॉर्ड के पेट म गोली लगे हे. कुल छै राउंड गोली चलाये गे हे. जेखर बाद करीब 13 लाख के लूट करे हे. मोटरसाइकिल सीडी डीलक्स हे.