नर्सरी ले 12वीं तक कम फीस म ही पढ़ सकही छात्र-छात्रा
रायपुर, 7 मई 2020। मुख्यमंत्री श्री भूपेश बघेल राज्य म शिक्षा के स्तर ल बढ़ाए बर हमेसा प्रयासरत रहिथे। इही क्रम म विशेष प्रयास ले पेंशनबाड़ा स्थित पुलिस पब्लिक स्कूल ल सीबीएसई ह 12वीं कक्षा तक मान्यता प्रदान कर देहे हे। जानबा हे के स्कूल भवन कई बछर ले खाली परे जर्जर होत रहिस। नवा सरकार आए के बाद मुख्यमंत्री श्री भूपेश बघेल ह एखर मरम्मत कराके स्कूल ल बने सहिन संचालित करे के निर्देश देहे रहिन। जेखर बाद से नवा सिरा ले योजना बनाके स्कूल ल संचालित करे जात हे।
सीबीएसई के विशेष टीम के निरीक्षण म सबो मानक पूरा पाए गीस, जेखर बाद मान्यता प्रदान करे गइस। अभी तक स्कूल आठवीं कक्षा तक संचालित होवत रहिस। ए सत्र ले इहां के छात्र-छात्रा 9वीं म एडमिशन ले सकही। स्कूल म पुलिसकर्मि मन के अलावा आम नागरिक मन के लइका मन ल घलोक प्रवेश दे जात हे।
डीजीपी श्री डी.एम.अवस्थी ह बताइस के ए स्कूल के खास बात हे के इहां पुलिसकर्मी ही शिक्षक के भूमिका निभाथें। सबो योग्यता पूरा करइया पुलिसकर्मि मन ल ही इहां पदस्थ करे गए हे। इहां पढ़ाई के संगे-संग लइका मन ल एक्स्ट्रा करिकुलर एक्टिविटी घलोक सिखाए जाथे। एखर अलावा खेलकूद अऊ आन गतिविधि घलोक सरलग संचालित होत रहिथे। स्कूल म कम्प्यूटर लैब, प्ले ग्राउंड, म्यूजिक क्लास जइसे सुविधा घलव हे। अभी हाल म स्कूल बिना कोनो व्यवसायिक लाभ के अपेक्षा से संचालित करे जात हे। पुलिस पब्लिक स्कूल म फीस आन स्कूल मन के अपेक्षा बहुतेच कम हे। पिछले साल स्कूल म 185 लइका पढ़त रहिन।
