रायपुर, राज्य स्तरीय युवा महोत्सव 2020 के आयोजन के सिलसिला म आज राजधानी के साइंस कालेज मैदान म चलत तियारी मन के जायजा अधिकारी मन ह लीन। ये आयोजन म करीबन 7 हजार भाग लेवइया प्रदेश के कई जिला ले आहीं। साइंस कालेज मैदान, पं. रविशंकर विश्वविद्यालय, खेल संचालनालय, पं. दीनदयाल उपाध्याय आडिटोरियम म सांस्कृतिक कार्यक्रम के प्रस्तुति दिए जाही। दस ले जादा जगा म मंच बनाय गए हे। खेल अउ युवा कल्याण सचिव श्री सिद्धार्थ कोमल परदेशी अऊ पर्यटन श्री अंबलगन पी. अउ नोडल अधिकारी मन ह ए सबो जगा के जांच करके अधिकारी मन ल जरूरी हुकुम दीन। ए अधिकारी मन ह युवा मन ल आयोजन स्थल म लाय ले जाय अऊ उंखर सुरक्षा संग कई ठन मुद्दा उपर तियारी के समीक्षा करिन।
खेल अउ युवा कल्याण सचिव श्री परदेशी ह कहिन कि ट्राइबल डान्स फेस्ट के जइसे हमला राज्य स्तरीय युवा महोत्सव ल घलोक सफल बनाना हे। ये आयोजन म करीबन सात हजार लोगन के आगमन होही जऊन 10 जगा म 37 विधा मन म 821 आने-आने कार्यक्रम होही। ये आयोजन प्रदेश भर के युवा भाग लेवत हें ओ मन रायपुर ले बने अनुभव के संग वापस जावयं ये हमर कोसिस होना चाही। ए काम बर हर जिला के नोडल अधिकारी बनाय गए हे जऊन जिला ले अवइया दल मन के रहे, खाए-पिए, परिवहन के व्यवस्था देखहीं अऊ सहायक नोडल उंखर सहायता करहीं। पर्यटन सचिव श्री अंबलगन पी. ह कहिन कि रायपुर शहर के 32 जगा मन म जिला मन ले आवत दल मन के रुके के व्यवस्था करे गए हे। ए जगा मन म छोटे-छोटे जरूरत ल नोडल अऊ सहायक नोडल अधिकारी ल देखना होही। रायपुर आईजी श्री आनंद छाबड़ा ह कहिन कि युवा मन के संग पुलिस के व्यवहार संयमित अऊ संवेदनशील होना चाही ताकि ओ मन पुलिस के बने छबि लेके जावयं। कलेक्टर श्री एस भारतीदासन ह सबो मन ल टीम भावना अऊ समन्वय ले काम करे म जोर दीन। ये बेरा म संयुक्त सचिव शिक्षा विभाग अउ प्रभारी अधिकारी श्री सौरभ कुमार, जिला पंचायत सीईओ श्री गौरव सिंह, सीएसआईडी के जीएम श्री प्रसाद, संचालक खेल अउ युवा कल्याण श्रीमती श्वेता सिन्हा संग भारतीय वन सेवा, राज्य प्रशासनिक सेवा के अधिकारी, सहायक नोडल अधिकारी अऊ खेल अउ युवा कल्याण विभाग के अधिकारीगण उपस्थित रहिन।
