मुख्यमंत्री ह छत्तीसगढ़ के सांसद मन के संग बैठक म कहिन
रायपुर, मुख्यमंत्री श्री भूपेश बघेल ह आज इहां मंत्रालय महानदी भवन म ये साल किसान मन ले समर्थन मूल्य म धान खरीदी अऊ केन्द्र सरकार ले पहिली साल के जइसे ये साल घलोक केन्द्रीय पूल बर छत्तीसगढ़ ले धान उपार्जन के संबंध म आयोजित छत्तीसगढ़ के सांसद मन के बैठक म कहिन कि छत्तीसगढ़ के सांसद किसान मन के हित म दलगत राजनीति ले ऊपर उठके केन्द्र सरकार कोति ले सेन्ट्रल पूल म ये साल छत्तीसगढ़ ले 32 लाख मीट्रिक टन चावल के उपार्जन करे के अनुमति देहे के मुद्दा उठावयं। बैठक म प्रदेश के कृषि मंत्री श्री रविन्द्र चौबे, लोकसभा सांसद डॉ. (श्रीमती) ज्योत्सना महंत, श्री दीपक बैज अऊ राज्यसभा सांसद श्रीमती छाया वर्मा, मुख्य सचिव श्री आर.पी. मण्डल, मुख्यमंत्री के प्रमुख सचिव श्री गौरव द्विवेदी, प्रमुख सचिव कृषि अऊ कृषि उत्पादन आयुक्त डॉ. (श्रीमती) मनिन्दर कौर द्विवेदी, खाद्य विभाग के सचिव डॉ. कमलप्रीत सिंह उपस्थित रहिन।
मुख्यमंत्री ह बैठक म कहिन कि छत्तीसगढ़ के किसान मन ले जुड़े ये बैठक म प्रदेश के सबो सांसद मन ल आमंत्रित करे गए रहिस। कुछ सांसद मन ह व्यस्तता के सेती उपस्थित नइ हो सके के संबंध म सूचना दीन। श्री बघेल ह कहिन कि प्रधानमंत्री श्री नरेन्द्र मोदी के नेतृत्व म केन्द्र सरकार ह साल 2014 म कहे रहिस कि जऊन राज्य सरकार किसान मन ल समर्थन मूल्य म धान खरीदी म बोनस देही उंखर से सेन्ट्रल पूल म चावल नइ ले जाए। फेर एखर बाद घलव पहिली दू बछर म ये प्रावधान ल शिथिल करके सेन्ट्रल पूल म छत्तीसगढ़ ले चावल लेहे गए रहिस। साल 2019-20 म सेन्ट्रल पूल म हमन प्रधानमंत्री ले प्रावधान ल शिथिल करके सेन्ट्रल पूल म छत्तीसगढ़ ले 32 लाख मीट्रिक टन चावल लेहे के आग्रह करे हन, काबर कि ये साल धान के जादा आवक के संभावना हे। ये संबंध म प्रधानमंत्री अऊ केन्द्रीय खाद्य मंत्री ल चिट्ठी घलोक लिखे गए हे, फेर उहां ले असहमति के चिट्ठी भेजे गए हे, जेमां लिखे गए हे कि 2500 रूपिया प्रति क्विंटल म धान खरीदी ले बाजार अव्यवस्थित हो जाही।
मुख्यमंत्री ह बैठक म कहिन कि छत्तीसगढ़ म 2500 रूपिया प्रति क्विंटल म धान खरीदी ले बाजार फले-फूले हे। श्री बघेल ह छत्तीसगढ़ के सबो सांसद, किसान अऊ व्यापारी मन ले आग्रह करे हें कि ओ मन किसान मन के हित म प्रधानमंत्री ल चिट्ठी लिखयं कि केन्द्र सरकार प्रावधान ल शिथिल करत ये साल सेन्ट्रल पूल म छत्तीसगढ़ ले 32 लाख मीट्रिक टन चावल के उपार्जन करे के अनुमति देवय।
श्री बघेल ह बैठक म कहिन कि किसान मन के हित म छत्तीसगढ़ सरकार ये साल घलोक किसान मन ले 2500 रूपिया प्रति क्विंटल म धान के खरीदी करही। ये साल करीबन 85 लाख मीट्रिक टन धान खरीदी होए के अनुमान हे। मुख्यमंत्री ह कहिन कि साल 2018-19 म हमन किसान मन ले 2500 रूपिया प्रति क्विंटल म धान खरीद के किसान मन ले करे गए वायदा पूरा करे हवन। ये साल घलोक 2500 रूपिया प्रति क्विंटल म धान के खरीदी करबोन।
दलगत राजनीति ले उठके किसान मन के हित म सहयोग देवव: श्री बघेल
सर्वदलीय बैठक म मुख्यमंत्री के अपील
मुख्यमंत्री श्री भूपेश बघेल ह समर्थन मूल्य म धान खरीदी ल लेके मंत्रालय म आयोजित सर्वदलीय बैठक म छत्तीसगढ़ के किसान मन के हित बर दलगत राजनीति ले ऊपर उठके सहयोग देहे के आग्रह करिन। ऊंखर आग्रह म राजनैतिक दल मन के प्रतिनिधि मन ह अपन पूरा समर्थन व्यक्त करिन।
मुख्यमंत्री ह बैठक म कहिन कि केन्द्रीय पूल म चावल के खरीदी नइ होए म राज्य के किसान मन अऊ अर्थव्यवस्था उपर प्रतिकूल प्रभाव परही। उमन कहिन कि राज्य शासन अपन संसाधन मन के संग किसान मन ल प्रति क्विंटल धान के मूल्य 2500 रूपिया देवत हे। केन्द्र सरकार ल खरीदी बर केवल अनुमति देना हे। बैठक म छत्तीसगढ़ जनता कांग्रेस (जे) के विधायक श्री धर्मजीत सिंह ह कहिन उंखर पार्टी ह 2500 रूपिया क्विंटल म धान खरीदी के निर्णय के तारीफ करे रहिन। ये निर्णय ले किसान मन ल राहत मिले हे अऊ उंखर आर्थिक स्थिति म सुधार होय हे। किसान मन के हित बर ओ मन सरकार के संग हे। बहुजन समाज पार्टी के श्री केशव चंद्रा ह कहिन कि किसान मन ल न्याय देवाए म ओ मन सरकार के पक्ष के समर्थन करत हें। से.पी.आई. के श्री से.आर.बख्शी, से.पी.आई.(एम) के श्री आर.डी.से.पी.राव अऊ एन.से.पी. के श्री सोनू गोस्वामी ह घलोक किसान मन के हित म राज्य सरकार के ये पक्ष के समर्थन करिन।
मंत्रालय म किसान संगठन अऊ किसान मन ले सीधा गोठ-बात
मुख्यमंत्री श्री बघेल ह समर्थन मूल्य म धान के खरीदी के संबंध म प्रदेश के कई ठन जिला मन ले आए किसान संगठन अऊ किसान मन ले सीधा गोठ बात करिन। मुख्यमंत्री ह समर्थन मूल्य म धान खरीदी के संबंध म सरकार के निर्णय अऊ कदम मन के परखर जानकारी दीन।
किसान मन ह सरकार के निर्णय के स्वागत करिन अऊ कहिन कि पहली पइत मंत्रालय म किसान मन के बैठक होवत हे। एखर बर मुख्यमंत्री के प्रति उमन आभार व्यक्त करिन। किसान मन ह बताइन कि 2500 रूपिया प्रति क्विंटल धान के खरीदी ले किसान मन के माली हालत म बिक्कट सुधार आए हे अऊ खेती ले युवा वर्ग घलोक जुड़त हें। खेती किसानी म घलोक रोजगार के नवा अवसर मिलत हे।
मुख्यमंत्री ह बैठक म आए किसान संगठन अऊ किसान मन ले अपन-अपन क्षेत्र के किसान, व्यापारी अऊ खेती किसानी ले जुड़े कई ठन संगठन मन ले सेन्ट्रल पूल म चावल खरीदी के संबंध म प्रधानमंत्री ल चिट्ठी लिखे के आग्रह करिन। किसान मन अऊ संगठन मन ह मुख्यमंत्री के ये आग्रह के स्वागत करत पूर्ण समर्थन देहे म अपन सहमति दीन।
