रायपुर। 2 मार्च 2020। छत्तीसगढ़ माध्यमिक शिक्षा मंडल बोर्ड परीक्षा मन के सिलसिला आज सोमवार 2 मार्च ले शुरू होगे हे. प्रदेश भर म आज ले 12वीं के परीक्षा शुरु होगे. एखर बर राज्य भर म 2 हजार 305 परीक्षा केंद्र बनाए गए हे. हायर सेकेंडरी म 2 लाख 77 हज़ार 475 अउ हाईस्कूल म 3 लाख 92 हज़ार 68 छात्र परीक्षार्थी परीक्षा म शामिल होही.
12वीं बोर्ड के आज पहली परीक्षा ‘हिंदी विषय’ के हे. जोन ल लेके परीक्षा केंद्र मन म तैयारी पूरा कर ले गए हे. लइका मन ल बिहनिया 9 बजे परीक्षा केंद्र म पहुंचना होही. 9.30 बजे ले लेखन के प्रक्रिया शुरु होही अउ मंझनिया 12.30 बजे तक चलही. ये दारी नवा पैटर्न म छात्र परीक्षा देही. आंसर शीट के कॉपी मन ल 40 ले घटाके 32 पेज के करे गए हे. साथ ही एक्स्ट्रा सप्लीमेंट्री पेपर के व्यवस्था घलो बंद कर दे गए हे. नकल रोके बर उड़नदस्ता टीम के घलो गठन करे गए हे. 12वीं बोर्ड के परीक्षा 2 मार्च ले 31 मार्च तक होना हे.
वहीं 3 मार्च ले 10वीं के बोर्ड परीक्षा शुरु होही. 3 मार्च ले 26 मार्च तक ये परीक्षा होना हे. बता देथन कि हर साल पेपर एक मार्च ले शुरू होथे, लेकिन ये दारी एक मार्च के रविवार होय के सेती दो मार्च ले परीक्षा शुरू करे गए हे. माध्यमिक शिक्षा मंडल ह अपन तैयारी पूरा कर ले हे.
