आम जनता ल आसानी से नागरिक सेवा देवइया मितान योजना के डिजिटल इनोवेशन बर चुने गइस
उत्तर प्रदेश योजना अउ निवेश कान्क्लेव के लखनऊ म होए आयोजन म करे गिस पुरस्कृत
रायपुर, 24 अगस्त, 2023
छत्तीसगढ़ के मुख्यमंत्री मितान योजना अपन डिजिटल नवाचार बर उत्तरप्रदेश म सहराए गिस। उत्तर प्रदेश सरकार ह डिजिटल नवाचार म उत्कृष्ट परियोजना श्रेणी म मुख्यमंत्री मितान योजना ल पुरस्कृत करे हे। ये पुरस्कार लखनऊ होए सम्मान समारोह म दिए गिस। ये पुरस्कार उत्तर प्रदेश योजना अउ निवेश कान्क्लेव म दिए गिस। ये कान्क्लेव के आयोजन उत्तरप्रदेश सरकार अउ इलेट्स ह करे रिहिस। मुख्यमंत्री मितान योजना बर छत्तीसगढ़ ल ये सम्मान डिजिटल माध्यम के उपयोग करत नगरीय सेवा मन ल आसानी से आम जनता ल उपलब्ध कराए के सेति दिए गिस।
कान्क्लेव म कहे गिस कि डिजिटल माध्यम ले लोगन ल सुविधा मन तक पहुंच आसान होथे। संगे संग येमे पारदर्शिता तको बाढ़थे। नगरीय निकाय मन म देहे जवइया सुविधा मन बर डिजिटल माध्यम के उपयोग ले नागरिक मन ल अबड़ेहे राहत मिलथे। अइसन म छत्तीसगढ़ म मुख्यमंत्री मितान योजना के नवाचार लाखों नगरवासी मन बर अबड़े राहत भरे योजना हरे। एकर ले भागदौड़ भरी जिंनगी म रहइया बड़का नागरिक आबादी ल निगम के सुविधा मन आसानी ले उपलब्ध हो जाथे।
उल्लेखनीय हे कि मुख्यमंत्री दाऊ भूपेश बघेल के नेतृत्व म नागरिक सेवा मन के गुणवत्तापूर्ण अउ बेरा म डिलीवरी बर ये योजना तैयार करे गे हावय। मितान योजना के माध्यम ले अब तक एक लाख बीस हजार सर्टिफिकेट दिये जा चुके हावय। मितान योजना के माध्यम ले नगरीय क्षेत्र मन म 25 किसम के सुविधा मन के लाभ लिये जा सकत हे। येमें टोल फ्री नंबर 14545 म काल करना होथे। तेकर पीछू मितान आपसे संपर्क करथे। निर्धारित दिन शेड्यूल करके दिए जाथे। सबो जरूरी प्रमाणपत्र मितान स्कैन कर लेथे अउ निगम कार्यालय जाए बिगर नागरिक के काम आसानी ले हो जथे। पहिली प्रदेश के 14 नगरीय निकाय मन म ये व्यवस्था लागू रिहिसे अब सबो नगरपालिका मन म तको ये व्यवस्था लागू होगे हावय।
मुख्यमंत्री मितान योजना के लागू होय के पीछू आय प्रमाण पत्र, जन्म अउ मृत्यु प्रमाण पत्र, मूल निवासी प्रमाणपत्र, भूमि के रिकार्ड के नकल, भूमि सूचना, दुकान अउ स्थापना पंजीकरण संबंधी दस्तावेज जइसन बुनियादी सुविधा मन बहुते आसानी ले मितान के माध्यम ले लोगन ल मिलत हावयं।