जांजगीर-चांपा, 04 फरवरी 202। जांजगीर-चांपा जिला म बने छत्तीसगढ़ी फिलिम आजा नदिया के पार के प्रदर्शन कई ठन सिनेमाघर मन म अवइया सात फरवरी ले होही। ये फिलिम के बनइया निर्देशक ज्ञानेश तिवारी हे। ये फिलिम म मुख्य भूमिका म अशरफ अली दयाल, विनोद उपाध्याय, कामेडी किंग विनायक अग्रवाल करे हें। संगें संग दूजे राम निषाद, सरला सिंह, मंदिरा नायक, धर्मेंद्र सेन, बाबूलाल सेन, रामकुमार खांडे, तरुण बघेल, लक्ष्मी नारायण सोनी अउ विशेष भूमिका मे अशोक उपाध्याय नजर आहीं।
ये फिलिम म फाइट मास्टर वरुण पान्डेय हे बउ कोरियोग्राफर मनोज दीप, शशांक तिवारी, पटकथा संवाद ज्ञानेश तिवारी, गीत ज्ञानेश तिवारी अउ शफिक खान के हे। एकर गीत मन ल अभिनव तिवारी अउ शौरभ महतो संगीत दे हे अऊ गीत मन ल स्वर ले सजाया हे छत्तीसगढ के जाने माने पार्श्व गायिका चंपा निषाद, अभिनव तिवारी अऊ शफिक खान ह।
ये फिलिम के मनखे मन बिकट दिन ले अगोरा करत रहिन काबर के ये फिलिम के पहिली भाग ले चल नदिया के पार ल मनखे मन किक्कट पसंद करे रहिन। जांजगीर चांपा के नगरदा क्षेत्र में शूट करे गए ये फिलिम 7 फरवरी ले अब देखइया मन बर प्रदर्शित होही। यमा माइ बात ये हे के ये फिलिम के प्रीमियर घलोक मेट्रो टॉकीज जांजगीर म करे जाही जिहां 36गढ़ी फिलिम मन बड़का-बड़का हीरो-हिराइन आहीं। जांजगीर के इतिहास म ये पहिली पइत होही जब कोनो फिलिम के पहिली प्रदर्शन जांजगीर के सिनेमाघर म करे जात हे।