- कुपोषण सबले बड़का चुनौती: मुख्यमंत्री कोति ले कुपोषण दूर करे बर ’हरिक नानी बेरा’ के करिन शुभारंभ
- तोकापाल म आयोजित वन अधिकार, सुपोषण अऊ ग्राम विकास कार्यशाला म होइन सामिल
- मुख्यमंत्री ह दीन 123. 88 करोड़ रूपिया के विकास काम मन के सौगात
रायपुर, मुख्यमंत्री श्री भूपेश बघेल ह कहिन हे कि पाछू सात महीना के कार्यकाल म नवा सरकार ह बहुत अकन अहम फैसला लेहे हे। ये फैसला मनखे मन के जीवन म बदलाव लवइया हे। किसान मन के कर्जमाफी, ढाई हजार प्रति क्विंटल के दर ले धान खरीदी, तेंदूपत्ता के खरीदी दर म बढ़ोतरी आदि फैसला मन ले आम नागरिक मन के क्रय शक्ति बाढ़े हे। इही कारन हे के जब देश के आटोमोबाईल सेक्टर मंदी के दौर ले गुजरत हे, छत्तीसगढ़ म ये सेक्टर म 25 प्रतिशत के इजाफा होय हे।
मुख्यमंत्री ह कहिन कि ना केवल मनखे मन के क्रय शक्ति बाढ़े हे भलुक राज्य सरकार ह इहां के नागरिक मन के मान-सम्मान अऊ स्वाभिमान बढ़ाए के घलोक काम करे हे। उमन कहिन कि आज बस्तर अऊ सरगुजा विकास प्राधिकरण के कमान स्थानीय विधायक मन तीर हे। हरेली, विश्व आदिवासी दिवस, छठ पूजा, तीजा अऊ कर्मा जयंती म राज्य सरकार कोति ले सार्वजनिक अवकाश देहे ले मनखे मन ल अहसास होवत हे कि प्रदेश म पहली पइत छत्तीसगढ़िया के सरकार हे। मुख्यमंत्री श्री बघेल आज बस्तर के तोकापाल म वन अधिकार, सुपोषण अऊ ग्राम विकास कार्यशाला ल सम्बोधित करत रहिन।
