छत्तीसगढ़ रासायनिक उर्वरक के कमी ल पूरा करे बर लिखही केन्द्र सरकार ल चिट्ठी
मुख्यमंत्री ह समीक्षा बइठका म दिन हुकुम
खातू-बीजा के आपूर्ति सुनिश्चित करे अउ वर्मी कम्पोस्ट के उपयोग ल देवय बढ़ावा
रइपुर, 13 जुलाई 2022
मुख्यमंत्री दाऊ भूपेश बघेल ह प्रदेश म केन्द्र ले रासायनिक उर्वरक मन के कमती अवई ल देखत कृषि उत्पादन आयुक्त ल केन्द्र ले मेल-जोल करके मांग के अनुरूप रासायनिक उर्वरक के आपूर्ति बर चिट्ठी लिखे बर कहीन। उन अधिकारी मन ले मौसम के स्थिति ऊपर नजर रखे अउ जिहां खाद, बीज के कमी हे, उहां खातू-बीजा के पर्याप्त मात्रा म उपलब्धता सुनिश्चित करे के निर्देश दिन हें। मुख्यमंत्री ह अपन मुख्यमंत्री निवास म होवइया बइठका म प्रदेश म वर्षा के स्थिति, खातू-बीजा के उपलब्धता, सिंचई बाँधा मन म जल भराव के स्थिति, खरीफ फसल मन के क्षेत्राच्छादन, संक्रामक बीमारी मन के रोकथाम के उपाय के समीक्षा करीन। मुख्यमंत्री कहीन कि वर्मी कम्पोस्ट के उत्पादन के मामला म छत्तीसगढ़ आने राज्य मन ले अबड़े आगू हवय। रासायनिक उर्वरक मन के कमी के पूर्ति काफी हद तक वर्मी कम्पोस्ट ले करे जा सकत हे। अवइया समय म वर्मी कम्पोस्ट के उत्पादन बढ़ाना होही। बारिश के दौरान संक्रामक बीमारी मन के रोकथाम के उपाय मन के समीक्षा के बेरा आवश्यक दवा मन के पर्याप्त मात्रा म भण्डारण, शहर मन म साफ-सफई, जल स्त्रोत, हैण्ड पम्प मन के साफ-सफई अउ क्लोरिनेशन कराए के निर्देश दिन।
मनरेगा के तहत भू-जल संरक्षण अउ संवर्धन के संरचना ल प्राथमिकता ले बनाए जाय। जेकर ले भू-जल स्तर सुधरही, सिंचई बर जल के उपलब्धता बाढ़ही अउ ईको सिस्टम बर तको लाभदायक होही। वन क्षेत्र मन म पीछु दो-तीन बछर म करवाए नरवा विकास के बूता मन के अच्छा परिणाम मिलत हे। तमोरपिंगला अउ अचानकमार म हाथी मन के दल काफी समय ले एके जगा म हे, काबर कि उहां वोमन ल पानी अउ चारा मिलत हे। अइसने हाथी प्रभावित आने क्षेत्र मन म तको नरवा विकास के बूता मन लउहे करे के आवश्यकता हे, येकर ले हाथी मानव द्वंद्व कम होही। गौठान मन म चारागाह विकास के समीक्षा के बेरा मुख्यमंत्री कहीन कि चारा के उत्पादन करइया समूह मन ल खुल्ला बाजार म चारा बेचे के अनुमति देवय, जेकर ले उन्कर आय बाढ़ही अउ उपराहा चारा के साईलेज बनाके मवेशी मन बर उपलब्ध कराय जावय।
