रायपुर, महिला अऊ बाल विकास मंत्री अऊ छत्तीसगढ़ राज्य महिला आयोग के अध्यक्ष श्रीमती अनिला भेडि़या ह आज दुर्ग जिला म महिला आयोग ल मिले प्रकरण मन के सुनवाई करत कहिन कि महिला आयोग, महिला मन के हित मन के रक्षा करके, ओ मन ल आत्म-सम्मान के संग जीवनयापन करे के अवसर प्रदान करे हे। राज्य महिला आयोग पीडि़त अऊ जरूरतमंद महिला ल प्राथमिकता के संग उचित न्याय देवाए बर काम करत हे। महिला आयोग के आगू जऊन प्रकरण आथे, ओखर हर पहलु मन के जांच करके न्याय देवाए के दिशा म भरसक उदीम करे जात हे।
श्रीमती भेंडि़या ह कहिन कि महिला आयोग ल मिले अइसन प्रकरण जेमां न्यायालयीन प्रक्रिया के जरूरत होथे उहां पीडि़त महिला ल विधिक सेवा प्राधिकरण ले निःशुल्क अधिवक्ता घलोक मुहैय्या कराये जात हे। मंत्री श्रीमती भेडि़या ह दुर्ग जिला ले मिले प्रकरण मन के पक्षकार मन के मौजूदगी म सुनवाई करिन। उमन दुनों पक्षकार मन के बात मन ल गंभीरतापूर्वक सुनिन। आयोग ह घरेलू हिंसा, कार्यस्थल म यौन उत्पीड़न, दहेज प्रतिषेध अधिनियम, सम्पत्ति विवाद, शारीरिक-मानसिक प्रताड़ना, मारपीट ले संबंधित आए प्रकरण मन म सुनवाई करिन। सुनवाई के समय दुनों पक्ष मन ल अपन पूरा बात रखे के अवसर देहे गीस। सुनवाई के समय आयोग के सदस्य श्रीमती ममता साहू, श्रीमती खिलेश्वरी किरण संग आयोग के अधिकारी मन ह पक्षकार मन के बात मन ल गंभीरता ले सुनिन। ये बेरा म पुलिस अऊ महिला अऊ बाल विकास विभाग के अधिकारी घलोक मौजूद रहिन।