छत्तीसगढ़ के अस्मिता, स्वाभिमान अउ सम्मान के प्रतीक हे छत्तीसगढ़ महतारी : मुख्यमंत्री दाऊ बघेल
गायता, पुजारी मन छत्तीसगढ़ महतारी के विधिवत पूजा-अर्चना करीन
रायपुर, 18 सितंबर 2023
मुख्यमंत्री दाऊ भूपेश बघेल ह अपन एक दिवसीय बीजापुर प्रवास के बेरा म कलेक्टर कार्यालय परिसर म छत्तीसगढ़ महतारी के प्रतिमा के अनावरण करीन अउ पुष्पार्पित करके उन ल नमन करीन। मुख्यमंत्री दाऊ बघेल ह प्रतिमा अनावरण के उपरांत कहीन कि छत्तीसगढ़ महतारी, छत्तीसगढ़ के अस्मिता, स्वाभिमान अउ सम्मान के प्रतीक हरे। उन मन कहीन कि सबो जिला म छत्तीसगढ़ महतारी के प्रतिमा लगाए जावत हावय ताकि लोगन मन म अपन संस्कृति ल लेके चेतना जागृत करे जा सकय। अपन तीज-त्यौहार, लोक परम्परा मन ल जाने-समझे के भावी पीढ़ी ल पर्याप्त अवसर मिलय, इही हमार प्रयास हरे।
ये बेरा म उद्योग, वाणिज्य कर अउ आबकारी मंत्री अउ बीजापुर जिला के प्रभारी मंत्री श्री कवासी लखमा,विधायक श्री विक्रम मंडावी जिला पंचायत अध्यक्ष श्री शंकर कुड़ियम, उपाध्यक्ष श्री कमलेश कारम ,जिला पंचायत सदस्य श्रीमती नीना रावतिया उद्दे, अउ कलेक्टर श्री राजेन्द्र कुमार कटारा सहित जनप्रतिनिधि अउ अधिकारी गण,उपस्थित रिहिन।
