- एके छत के तरी मिलही महिला समूह मन के बनाए जम्मो समान
- मुख्यमंत्री ह गोधन न्याय योजना के हितग्राही मन के खाता म 11वां अऊ 12वां किश्त के रूप म 7.53 करोड़ रूपिया भेजिन
- गोधन न्याय योजना के हितग्राही मन ल अब तक 71.72 करोड़ रूपिया के भुगतान
- गोधन न्याय योजना के 1.45 लाख हितग्राही मन म 57 हजार ले जादा भूमिहीन किसान
रायपुर, 20 जनवरी 2021। मुख्यमंत्री श्री भूपेश बघेल ह गौठान मन म महिला समूह मन के बनाए उत्पाद, वन क्षेत्र के समूह मन के लघु वनोपज के प्रसंस्करण ले तियार करे जात उत्पाद जइसे शहद, वनौषधि, बस्तर शिल्प के कलाकृति, हैण्डलूम वस्त्र, कोसा वस्त्र जइसे विशिष्ट उत्पाद शहरी क्षेत्र मन म एके छत के नीचे बिक्री बर उपलब्ध कराए बर ‘‘सीजी मार्ट‘‘ चालू करे के निर्देश देहे हें। उमन कहिन के सीजी मार्ट म महिला मन के उत्पाद मन के बिक्री होवय अऊ एकर लाभ ओ मन ल मिलय। उमन कहिन के सीजी मार्ट पहिली राजधानी रायपुर, फेर संभाग अऊ जिला स्तर म चालू करे जाय चाही। उमन कहिन के सीजी मार्ट म तेलघानी के सरसों, अलसी, राई आदि के तेल घलोक बिक्री बर रखे जाय। जानबा हे के राज्य शासन ह हालेच म तेलघानी बोर्ड के गठन करे फैसला लेहे हे।
मुख्यमंत्री अपन निवास कार्यालय म आयोजित समारोह म गोधन न्याय योजना के हितग्राही मन ल ग्यारहवां अऊ बारहवां किश्त के राशि अंतरण के बाद संबोधित करत रहिन। उमन गोबर विक्रेता मन ल ग्यारहवां किश्त के रूप म 16 ले 31 दिसम्बर तक गोबर बिक्री के राशि 4.51 करोड़ रूपिया अऊ बारहवां किश्त के रूप म 01 जनवरी ले 15 जनवरी तक के राशि 3.02 करोड़ रूपिया ये प्रकार ले कुल 7.53 करोड़ रूपिया के राशि गोबर विक्रेता मन के खाता म ऑनलाइन अंतरित करिन। एला मिलाके अब तक गोधन न्याय योजना के अंतर्गत किसान अऊ पशुपालक मन ल 71 करोड़ 72 लाख रूपिया के राशि देहे जा चुके हे।
कार्यक्रम म कृषि अऊ जलसंसाधन मंत्री श्री रविन्द्र चौबे, खाद्य मंत्री श्री अमरजीत भगत, उद्योग मंत्री श्री कवासी लखमा, महिला अऊ बाल विकास मंत्री श्रीमती अनिला भेंडि़या, विधायक श्री अमितेश शुक्ला, श्री देवव्रत सिंह, मुख्यमंत्री के सलाहकार श्री प्रदीप शर्मा, छत्तीसगढ़ खनिज विकास निगम के अध्यक्ष श्री गिरीश देवांगन, कृषि उत्पादन आयुक्त डॉ. एम. गीता, मुख्यमंत्री के सचिव श्री सिद्धार्थ कोमल सिंह परदेशी, इंदिरा गांधी कृषि विश्वविद्यालय के कुलपति डॉ. एस.के. पाटिल अऊ कुल सचिव श्री प्रभाकर सिंह उपस्थित रहिन।