- मुख्यमंत्री ह राज्य के विकास बर देहे गए बहुत अकन प्रस्ताव अऊ सहयोग के आग्रह करिन
- साल 2022 के बाद अवइया पांच बछर तक घलोक राज्य मन ल जी.एस.टी. क्षतिपूर्ति दिए जाय, केन्द्रीय कर मन म राज्य मन के हिस्सा 42 प्रतिशत ले बढ़ाके 50 प्रतिशत करे जाए
रायपुर, 15वां वित्त आयोग के अध्यक्ष श्री एन.के. सिंह अऊ मुख्यमंत्री श्री भूपेश बघेल के उपस्थिति म आज अटल नगर, नवा रायपुर, मंत्रालय म छत्तीसगढ़ शासन के मंत्री परिषद के सदस्य मन, वित्त आयोग के सदस्य मन अऊ राज्य के वरिष्ठ अधिकारी मन के महत्वपूर्ण बैठक आयोजित होइस।
बैठक म सबले पहिली छत्तीसगढ़ म मुख्यमंत्री श्री बघेल ह वित्त आयोग के स्वागत करिन अऊ कहिन कि छत्तीसगढ़ राज्य म विकास के व्यापक संभावना मन के संग विशिष्ठ चुनौती हे। संभावना मन के दोहन अऊ चुनौती मन के सामना करत छत्तीसगढ़ राज्य ल विकास के लंबा सफर तय करना अभी बांचे हे। उमन राज्य के विकास बर लेहे गे महत्वपूर्ण निर्णय, कार्यक्रम अऊ कार्य मन के जानकारी दीन अऊ आयोग ल छत्तीसगढ़ के विकास अऊ इहां के नागरिक मन के हित म काम करे के दृष्टि ले बहुत अकन प्रस्ताव दीन अऊ आयोग ले ये संबंध म सहयोग देहे के आग्रह करिन। उमन छत्तीसगढ़ म शिक्षा, स्वास्थ्य, रोजगार अऊ कुपोषण बर वित्त आयोग ले विशेष रूप ले अनुरोध करिन।
बैठक म राज्य के मानव विकास सूचकांक, पर्यावरण सरंक्षण, वामपंथी उग्रवाद, क्षेत्रीय असंतुलन, वन क्षेत्र मन म विकास अऊ इहां के चुनौतियों, समस्या मन उपर विस्तार ले चर्चा करे गीस अऊ पॉवरपाइंट प्रदर्शन के माध्यम ले घलोक जानकारी दिए गीस। आयोग के अध्यक्ष श्री एन.के. सिंह ह बैठक के आखरी म छत्तीसगढ़ के परिस्थिति मन के संग इहां के नक्सल अऊ वन क्षेत्र मन के विशिष्ट समस्या मन ल देखत मुख्यमंत्री अऊ विचार-विमर्श के समय प्राप्त प्रस्ताव अऊ सुझाव मन उपर सहानभूतिपूर्वक विचार करे के बात कहिन।
