रायपुर, प्रधानमंत्री श्री नरेन्द्र मोदी ह आज छत्तीसगढ़ के राजधानी रायपुर के पंडित रविशंकर शुक्ल विश्वविद्यालय, एनसीसी ग्राउंड म आयोजित समारोह म 7600 ले जादा लागत के कई ठन विकास परियोजना मन के लोकार्पण-शिलान्यास अऊ शुभारंभ करिन। ये बेरा म मुख्यमंत्री श्री भूपेश बघेल ह समारोह ल संबोधित करत कहिन कि छत्तीसगढ़ नवोदित राज्य ये, ते पाए के छत्तीसगढ़ ल जादा ले जादा मदद केन्द्र कोति ले मिलना चाही। उमन प्रधानमंत्री श्री नरेन्द्र मोदी के स्वागत करत कहिन कि ये हमार बर बहुत खुशी के बात हे कि हमार प्रधानमंत्री छत्तीसगढ़ के दौरा म आए हें। प्रभु श्रीराम के ननिहाल अऊ माता कौशल्या के भूइयां म मैं उंखर स्वागत करत हंव। प्रधानमंत्री जी ले हम बहुत अकन मंच म मिलथन अऊ नीति आयोग आदि के बैठक म मिलथन। हम मांग घलोक रखथन फेर ओ मन ल अऊ दोहराना नइ चाहव। मैं गडकरी जी के संग घलोक बइठथंव जतका मांगथंव ओखर ले जादाच देथें।
मुख्यमंत्री ह एखर पहिली प्रधानमंत्री श्री नरेन्द्र मोदी के हेलीपेड पहुंचे म उंखर अगवानी करिन अऊ समारोह के मंच म ओ मन ल राजकीय गमछा पहिरा के अऊ मिलेट्स ले बने उत्पाद भेंटकरके उंखर स्वागत करिन।
ये बेरा म छत्तीसगढ़ के राज्यपाल श्री विश्वभूषण हरिचंदन, छत्तीसगढ़ के मुख्यमंत्री श्री भूपेश बघेल, केन्द्रीय सड़क परिवहन अउर राजमार्ग मंत्री श्री नितिन गडकरी, केन्द्रीय स्वास्थ्य अउर परिवार कल्याण मंत्री डॉ. मनसुख मंडाविया, छत्तीसगढ़ के उप मुख्यमंत्री श्री टी.एस. सिंहदेव, केन्द्रीय जनजातीय काम मंत्री श्रीमती रेणुका सिंह, छत्तीसगढ़ के गृह मंत्री श्री ताम्रध्वज साहू, विधानसभा नेता प्रतिपक्ष श्री नारायण चंदेल, लोकसभा सांसद श्री अरूण साव अऊ श्री सुनील सोनी, विधायक डॉ. रमन सिंह संग बहुत अकन जनप्रतिनिधि उपस्थित रहिन।
