रायपुर, मुख्यमंत्री श्री भूपेश बघेल ह कहिन कि छत्तीसगढ़ के तीज तिहार, रहन-सहन, बोली अऊ भाखा इहां के पहिचान हे। राज्य सरकार इहां के संस्कृति के संरक्षण अऊ संवर्धन बर हर संभव उदीम करत हे।
मुख्यमंत्री श्री बघेल आज अपरान्ह अपन निवास म उंखर ले मिले आए छत्तीसगढ़ प्रदेश साहू संघ के प्रतिनिधि मंडल ल संबोधित करत रहिन। एखर पहिली प्रतिनिधि मंडल ह मुख्यमंत्री ल राज्य शासन कोति ले भक्त माता कर्मा जयंती, हरेली अऊ हरितालिका तीज पर्व म सामान्य अवकाश घोषित करे म ऊंखर प्रति आभार व्यक्त करिन।
मुख्यमंत्री ह कहिन कि हरेली प्रदेश के किसान मन के प्रमुख तिहार ये। हरितालिका तीज पर्व बहिनी-बेटी मन के तिहार ये अऊ भक्त माता कर्मा जयंती के पर्व प्रदेश म साहू समाज कोति ले बड़े उत्साह ले मनाये जाथे। समाज म एकता, भाईचारा अऊ प्रेम छत्तीसगढ़ी संस्कृति के अभिन्न अंग ये। हमला छत्तीसगढ़ के अपन ये विशेषता ल बनाए रखना होही। इहां के पर्व मन म सामान्य अवकाश के घोषणा छत्तीसगढ़ के संस्कृति अऊ पहिचान ल बरकरार रखे के दिशा म एक पहल ये।
मुख्यमंत्री ह कहिन कि स्कूल के लइका मन ल छत्तीसगढ़ी संग हल्बी, गोड़ी अऊ कुडूख भाखा म घलोक शिक्षा दीए जाही। उमन प्रतिनिधि मंडल के मनखे मन ल किसान मन के कृषि ऋण माफी, 2500 रूपिया प्रति क्विंटल म धान के खरीदी, तेंदूपत्ता संग्राहक मन ल 4000 रूपिया प्रति मानक बोरा के मान ले पारिश्रमिक, वन क्षेत्र मन के निवासी मन के वन अधिकार अधिमान्यता पत्र प्रदान करे के काम अऊ प्रदेश म 15 हजार शिक्षक मन, करीबन 1300 सहायक प्राध्यापक मन के भर्ती के जानकारी दीन।
मुख्यमंत्री ह नरवा, गरूवा, घुरवा अऊ बाड़ी योजना के उल्लेख करत कहिन कि ये एक जन आंदोलन ये। एखर बर राज्य सरकार कोति ले प्रबंध करे जात हे, फेर इकर संचालन गांव वाले मन ल ही करना होही। उमन ये योजना ल सफल बनाए बर साहू समाज ले सक्रिय सहयोग के आव्हान करिन। उमन कहिन कि धान ले इथेनाल बनाए के संयंत्र लगाय बर समाज के युवा मन ल आगू आना चाही।
प्रतिनिधि मंडल म छत्तीसगढ़ प्रदेश साहू संघ के प्रदेशाध्यक्ष श्री विपिन साहू, महामंत्री श्री मोतीलाल साहू, अखिल भारतीय साहू संघ के कार्यकारी अध्यक्ष श्रीमती ममता साहू संग प्रदेश अऊ कई ठन जिला संघ मन के बहुत अकन पदाधिकारी अऊ समाज के सदस्य बड़ संख्या म सामिल रहिन।
