नवा छत्तीसगढ़ गढ़े म महिला मन के बड़का भूमिका : राज्यपाल सुश्री उइके

रायपुर, राज्यपाल सुश्री अनुसुईया उइके ह आज इहां टी.वी.27 न्यूज चैनल कोति ले ‘‘गढ़बो नवा छत्तीसगढ़’’ म महिला मन के भूमिका विसय उपर आयोजित कार्यक्रम ल संबोधित करत कहिन कि ये बहुत गर्व के विसय हे कि चैनल के संचालन महिला मन कोति ले करे जात हे अऊ संस्थान के बड़का पद ले लेके जिला के संवाददाता तक के पद म महिला मन ही काम करत हें। अइसन संभव हे कि पहली पईत सुने म मनखे मन ल भरोसा झन होवय फेर अब इही हकीकत हे कि हमर बहिनीन, बेटी मन हर क्षेत्र म कंधा ले कंधा मिलाके चलत हे। महिला मन के शत-प्रतिशत प्रतिनिधित्व वाला ये चैनल निश्चित ही महिला मन ले जुड़े मुद्दा ल बड़ संवेदनशीलता के संग मनखे मन के सामने रखही। उमन कहिन कि नवा छत्तीसगढ़ गढ़े म आप सबो के संग प्रदेश के महिला मन के भूमिका बड़का हे। आप सबो मन के योगदान ले ही ये प्रदेश आज उत्तरोत्तर विकास करत हे। ये बेरा म पद्मविभूषण ले सम्मानित प्रसिद्ध पंडवानी गायिका श्रीमती तीजनबाई, राज्य महिला आयोग के अध्यक्ष श्रीमती किरणमयी नायक, पद्मश्री सम्मान ले सम्मानित श्रीमती शमशाद बेगम विशेष रूप ले उपस्थित रहिन।