राज्यपाल के पहल ले बलरामपुर जिला के दिव्यांग बेटी के होही इलाज

रायपुर, 12 जुलाई 2021। राज्यपाल सुश्री अनुसुईया उइके ले आज इहां राजभवन म श्रीमती फुलमनिया ह अपन दिव्यांग बेटी शशिप्रभा के संग मुलाकात करिस। राज्यपाल ल मीडिया के माध्यम ले बलरामपुर जिला के एक छोटे से गांव करकली म रहइया सात बछर के शशिप्रभा के बारे म जब पता चलिस कि वो चले फिरे अऊ बोले म असमर्थ हे अऊ सरगुजा म ओखर इलाज नइ हो पात हे। तब उमन अपने आप संज्ञान लेत जिला प्रशासन बलरामपुर ल शशिप्रभा ल ओखर परिजन मन के संग राजभवन भिजवाए के निर्देश दीन। ताकि इहां के चिकित्सक मन ले परामर्श लेके ओखर इलाज कराए जा सकय। शशिप्रभा के पिताजी के मृत्यु हो गे हे अऊ उंखर आर्थिक हालत अच्छा नइ हे, ते पाए के राज्यपाल सुश्री उइके ह ओखर मां अऊ संग म आए मौसी श्रीमती कांता ल आश्वासन दीस कि वोखर बेटी के हरसंभव इलाज कराए जाही। राज्यपाल के सहृदयशीलता ले श्रीमती कांता अऊ श्रीमती फुलमनिया के आंखी म आंसू आ गे। उमन कहिन कि हमन सोचे घलोक नइ रहेन कि रायपुर आके हमर बेटी के इलाज हो सकही। उमन राज्यपाल ल एखर बर अंतस ले धन्यवाद दीन।