- मुख्यमंत्री श्री भूपेश बघेल चंदखुरी म पर्यटन परिपथ के निर्माण अऊ सौंदर्यीकरण काम के करहीं शुभारंभ
रायपुर, मुख्यमंत्री श्री भूपेश बघेल 22 दिसम्बर के बिहनिया 11 बजे माता कौशल्या मंदिर परिसर चंदखुरी म राम वन गमन पर्यटन परिपथ निर्माण के संगेच माता कौशल्या मंदिर परिसर म जीर्णोद्धार काम के शुभारंभ करहीं। ये मौका म आयोजित कार्यक्रम के अध्यक्षता गृहमंत्री श्री ताम्रध्वज साहू करहीं। कार्यक्रम म विशिष्ट अतिथि के रूप म संस्कृति मंत्री श्री अमरजीत भगत, नगरीय प्रशासन मंत्री डॉ. शिव कुमार डहरिया, रायपुर जिला पंचायत के अध्यक्ष श्रीमती शारदा देवी वर्मा, जनपद पंचायत आरंग के अध्यक्ष श्री दिनेश ठाकुर, ग्राम पंचायत चंदखुरी के सरपंच श्रीमती इंदु शर्मा अऊ कौशल्या माता समिति के अध्यक्ष श्री देवेन्द्र वर्मा उपस्थित रइहीं।
आप जानतेच हवव के मुख्यमंत्री श्री भूपेश बघेल ह छत्तीसगढ़ म राम वनगमन पर्यटन परिपथ निर्माण के घोषणा करे हें। जेखर तहत छत्तीसगढ़ सरकार राम वन गमन रस्ता के महत्वपूर्ण स्थल मन ल पर्यटन स्थल के रूप म विकसित करत हे। ये मा पहिली चरण म सीतामढ़ी हरचौका, रामगढ़, शिवरीनारायण, तुरतुरिया, चंदखुरी, राजिम, सिहावा के सप्तऋषि आश्रम, जगदलपुर अऊ सुकमा जिला के रामाराम ल राज्य शासन के पर्यटन विभाग कोति ले ए जगा मन ल पर्यटन परिपथ के रूप म विकसित करे जात हे। एखरे संग रायपुर जिला के चंदखुरी स्थित माता कौशल्या के प्राचीन मंदिर परिसर के घलोक जीर्णोद्धार अउ सौंदर्यीकरण के काम करे जात हे।
शोधकर्ता मन के शोध किताब मल ले मिले जानकारी मुताबिक प्रभु श्रीराम ह अपन वनवास काल के 14 बछर म ले करीबन 10 साल ले जादा के समय छत्तीसगढ़ म गुजारे रहिन। कई शोध प्रकाशन मन के मुताबिक प्रभु श्रीराम ह छत्तीसगढ़ म वनगमन के समय करीबन 75 जगा म घूमिन। जेमां ले 51 स्थल अइसे हे, जिहां प्रभु राम ह भ्रमण के समय रूकके कुछ समय व्यतीत करे रहिन। राम वनगमन स्थल मन म ले पहिली चरण एमां ले 8 स्थल के पर्यटन के दृष्टि ले विकास बर चयन करे गए हे। इहां जरूरत के मुताबिक पहुंच मार्ग के उन्नयन, साईनजेस, पर्यटक सुविधा केन्द्र, इंटरप्रिटेशन सेंटर, वैदिक विलेज, पगोड़ा, वेटिंग शेड, मूलभूत सुविधा (पेयजल व्यवस्था, शौचालय), सीटिंग बेंच, रेस्टोरेंट, वाटर फ्रंट डेव्हलपमेंट, विद्युतीकरण आदि काम कराए जाही। राम वन गमन मार्ग म अवइया स्थल मन ल पर्यटन स्थल के रूप म विकसित करे के काम रायपुर जिला के आरंग तहसील के गांव चंदखुरी स्थित माता कौशल्या मंदिर ले चालू करे जात हे।