रायपुर, स्कूल शिक्षा विभाग कोति ले काली जिला कलेक्टर मन ल मध्यान्ह भोजन के मेन्यू के संबंध म स्पष्टीकरण जारी करे हे। कलेक्टर मन बर लिखे गए चिट्ठी म कहे गए हे कि विभाग के एक आन पत्र नंबर एफ 7-1/2014/20-एक दिनांक 15.01.2019 के तहत प्रोटीन अऊ कैलोरी के पूर्ति बर मध्यान्ह भोजन के संग हफ्ता म कम से कम दू दिन अण्डा या दूध या समतुल्य न्यूट्रीशन मूल्य के खाद्य पदार्थ दीए जाय के उल्लेख अऊ सुझाव हे। काबर कि शाकाहारी परिवार के बालक अऊ बालिका मन घलोक शासकीय शाला मन म मध्यान्ह भोजन ग्रहण करत हे, जेखर सेती स्कूल शिक्षा विभाग कोति ले सुझाव के क्रियान्वयन के संबंध म कलेक्टर मन ल स्पष्टीकरण जारी करे गए हे।
ये स्पष्टीकरण के तहत स्कूल शिक्षा विभाग के प्रमुख सचिव ह कलेक्टर मन ल निर्देशित करे हे कि अवइया दू हफ्ता म शाला विकास समिति अऊ पालक मन के बैठक शाला स्तर म आयोजित कराए जाय। ये बैठक म अइसन छात्र-छात्रा मन ल चिन्हित करे जाए जऊन मध्यान्ह भोजन म अण्डा ग्रहण नइ करना चाहत हें।
मध्यान्ह भोजन तियार करे के बाद अलग ले अण्डा उबाले या पकाए के व्यवस्था करे जाय। एखर तहत जऊन छात्र-छात्रा मन ल चिन्हित करे गए हे, ओ मन ल मध्यान्ह भोजन के बेरा अलग जगा म बइठाके मध्यान्ह परोसे जाए।
पत्र म कहे गए हे कि जऊन शाला मन म अण्डा वितरन करे के होवय, उहां शाकाहारी छात्र-छात्रा मन बर आन प्रोटीनयुक्त खाद्य पदार्थ जइसे सुगंधित सोया दूध, सुगंधित मिल्क, प्रोटीन क्रंच, फोर्टिफाइड बिस्किट, फोर्टिफाइड सोयाबड़ी, सोया मूंगफल्ली चिकी, सोया पापड़, फोर्टिफाइड दाल आदि विकल्प के व्यवस्था करे जाए।
पत्र म ये घलोक कहे गए हे कि कहूं पालक मन के बैठक म मध्यान्ह भोजन म अण्डा दिये जाय बर आम सहमति न होवय, त अइसन शाला मन म मध्यान्ह भोजन के संग अण्डा न देके घर पहुंचा के, पूरक आहार के प्रदाय के रीति शाला विकास समिति कोति ले विकसित करे जाय।
फोटू नई दुनिया ले साभार
