रायपुर GG Digital News Desk, छत्तीसगढ़ लोक सेवा आयोग (CGPSC) 2024 के नतीजा आए के बाद, मेरिट लिस्ट मा जगा बनइया टॉप 10 होनहार अभ्यर्थी मन ह काली मुख्यमंत्री विष्णु देव साय ले उंकर निवास मा सौजन्य मुलाकात करिन। ए मौका मा मुख्यमंत्री ह सबो नवा चुने गए अफसर मन ला अउ उंकर परिवार ला बधाई दीन।
सीएम साय ह दीन बड़का सीख: बातचीत करत खानी मुख्यमंत्री साय ह पास होवइया लइका मन ले उंकर तैयारी अउ संघर्ष के बारे मा गोठ-बात करिन। उन नवा अधिकारी मन ला समझावत कहिन के “तुमन कतको बड़का पद मा चल दव, फेर हमेशा याद रखहू के तुमन एक ‘लोकसेवक’ अव। अधिकारी बने के बाद घलो मन मा विनम्रता होना चाही। जनता के काम ला धैर्य ले सुनहू अउ संवेदनशीलता के संग निपटाहु, तब जा के लोगन के भरोसा प्रशासन ऊपर बने रइही।”
पारदर्शिता के बात:
मुख्यमंत्री ह कहिन के सरकार ह कसम खाए रिहिस के पीएससी के परीक्षा मा पूरा पारदर्शिता बरतही, अउ ये परिणाम ओखरे सबूत हरे के मेहनत करइया लइका मन ही आघू आए हें। सरकार युवा मन ला सुविधा देहे बर बाना उंचाए हे।
टॉपर्स मन ह करिन वादा:
सीएम ले मिले बर पहुँचे टॉपर (देवेश प्रसाद साहू, स्वप्निल वर्मा, यशवंत कुमार देवांगन अउ बाकी संगी) ह कहिन के ये सफलता उंकर बर एक ठी जिम्मेदारी हरे। सबो झन भरोसा देवाइन के वोमन पूरा ईमानदारी अउ निष्ठा ले छत्तीसगढ़ महतारी के सेवा करहीं।
ये मौका मा विधायक ललित चंद्राकर अउ राजभाषा अधिकारी छगन लाल नागवंशी घलो मौजूद रिहिन।