- सीजीस्कूलडॉटइन पोर्टल म शुरू करे गीस सुविधा
- स्नातक विषय मन के पढ़ाई बर 1241 वीडियो, 280 कोर्स मटेरियल अऊ 18 ऑडियो लेक्चर करे गीस अपलोड
- पोर्टल म 32 हजार ले जादा महाविद्यालयीन पढ़ईया लईका मन अऊ 3385 प्राध्यापक मन ह कराइन पंजीयन
रायपुर, 17 अप्रैल 2020। मुख्यमंत्री श्री भूपेश बघेल ह आज सीजीस्कूलडॉटइन पोर्टल म महाविद्यालयीन पढ़ईया लईका मन बर ऑनलाईन पढ़ाई के सुविधा के शुभारंभ करिन। जानबा हे के स्कूली लइका मन के पढ़ई बर सीजीस्कूल डॉट इन पोर्टल चालू करे गए हे। इही पोर्टल म महाविद्यालयीन पढ़ईया लईका मन बर घलोक ऑनलाईन पढ़ाई के सुविधा चालू करे गए हे।
जानबा होए हे के कोरोना वायरस संक्रमण के रोकथाम बर राज्य शासन कोति ले लागू करे लॉकडाउन के सेती महाविद्यालय पाछू कई दिन ले बंद हे अऊ सबो स्तर के परीक्षा मन स्थगित कर देहे गए हे। लॉकडाउन खतम होए के बाद लंबित परीक्षा मन के आयोजन अउ आगामी शिक्षा सत्र के बेरा म संचालन कठिन चुनौती होही। एला देखत अवइया शिक्षा सत्र म क्लासरूम शिक्षण के संगें-संग ऑनलाइन पोर्टल म महाविद्यालयीन पढ़ईया लईका मन ल घलोक अध्ययन-अध्यापन के सुविधा उपलब्ध कराए जात हे। ये बेरा म उच्च शिक्षा मंत्री श्री उमेश पटेल, स्कूल शिक्षा विभाग के प्रमुख सचिव डॉ. आलोक शुक्ला, उच्च शिक्षा विभाग के सचिव श्रीमती अलरमेल मंगई डी उपस्थित रहिन।