लॉकडाउन म चकमक अभियान लाइस जशपुर के लइका मन बर ज्ञान के पिटारा

जशपुर, 02 मई 2020। लॉकडाउन म जब सबो आंगनबाड़ी बंद हे चकमक अभियान अऊ सजग कार्यक्रम लइका मन बर ज्ञान के पिटारा लेके आए हे। एखर से न सिरिफ लइका मन के बौद्धिक विकास होवत हे भलुक लइका मन खुशी-खुशी शारीरिक गतिविधि मन म घलोक हिस्सा लेवत हें। जशपुर जइसे दूरस्थ अऊ आदिवासी अंचल म घलोक नान्हें लइका मन ल वॉल पेंटिंग, औपचारिक शिक्षा म राज्य शासन कोति ले तियार करे गए फिल्म देखाए जात हे। लइका मन ल छत्तीसगढ़ी बाल गीत, आकर्षक कार्टून, वीडियो आधारित पढ़ई आकर्षित करत हें। एखर संगेच सजग कार्यक्रम के तहत् लइका मन के अभिभावक मन ल ऑडियो मैसेज तको देहे जात हे। ऑडियो मैसेज के माध्यम ले पालक मन ल लइका मन के उचित देख-रेख अउ पोषण संबंघी जानकारी देहे के संग लइका मन ल कहानी सुनाए अऊ अपन अनुभव ले लइका मन ल सिखाए बर प्रेरित करे जात हे। एखर से लइका मन म सीखे म रूचि बाढ़त हे।