रइपुर, 18 अगस्त 2021 बुधवार। मुख्यमंत्री दाउ भूपेश बघेल ह महाराजा चक्रधर सिंह ल उन्कर जयंती 19 अगस्त म नमन करीन। अउ अपन संदेश म कहीन कि रायगढ़ के महाराजा चक्रधर सिंह समर्पित कला साधक होए के संंगे संग ऊंच कोटि के विद्वान अउ संगीत शास्त्र के ज्ञाता रिहिस। संगीत अउ शास्त्रीय नृत्य कला के गौरवशाली संस्कृति के बचाव अउ बगराव म उन मन उल्खलेनीय योगदान दीन। कत्थक के अबड़ अकन नवा बंदिश तियार करीन अउ नृत्य अउ संगीत विधा के कई ठोन साहित्यिक कृति मन के रचना करीन। अनुभूति अउ संगीत के दाहरा म बूड़के उन मन कत्थक के विशिष्ट स्वरुप ल बढ़ाइस जेला रायगढ़ घराना के नाम ले जाने जाथे। रायगढ़ ल देश के प्रमुख सांस्कृतिक केन्द्र के रूप में संवारे के श्रेय महाराजा चक्रधर सिंह ल जाथे।
दाउ बघेल ह कहीन कि संगीत अउ नृत्य कला के बढ़वार अउ बगराव म महाराजा चक्रधर सिंह के योगदान ल चिरस्थायी बनाए बर हर बछर रायगढ़ म अखिल भारतीय चक्रधर समारोह के आयोजन करे जाथे, जेमा देश के सुप्रसिद्ध कलाकार प्रस्तुति देथे। एकरे संग छत्तीसगढ़ सरकार कोति ले संगीत अउ कला के क्षेत्र म उल्लेखनीय योगदान बर राजा चक्रधर सिंह सम्मान देहे जाथे। महाराज चक्रधर सिंह ल उन्कर संगीत अउ कला के क्षेत्र म असाधारण योगदान बर सरीदिन सुरता करे जाही।
