रायपुर, 01 फरवरी 2024। कृषि विकास अउ किसान कल्याण मंत्री श्री रामविचार नेताम ह आज नवा रायपुर स्थित न्यू सर्किट हाउस के बेंक्वेट हाल म विभागीय काम-काज के समीक्षा करिन। मंत्री श्री नेताम ह बैठक म कहिन कि पात्र अऊ सही किसान मन ल शासन के योजना मन के लाभ मिलय ये ठउका होवय। केंद्र अऊ राज्य सरकार के योजना मन के बेहतर क्रियान्वयन करे जाए। जैविक खेती ल बढ़ावा मिलय। उमन कहिन कि सरकार के किसान हितैषी नीति मन के सेती ज्यादातर किसान धान के फसल लेहे लगे हे, लेकिन एखर से पानी के उपयोग बाढ़े हे, जेखर से अवइया समय म पानी के समस्या घलोक हो सकत हे। संगेच दलहन जइसे फसल लेहे ले जमीन के उर्वरा शक्ति बाढ़थे। जेखर सेती दलहन, तिलहन जइसे चक्रीय फसल मन बर किसान मन ल प्रोत्साहित करे जाए अउ ए चक्रीय फसल के लाभ के बारे म किसान मन ल बतावव। मंत्री श्री नेताम ह प्रधानमंत्री किसान सम्मान निधि योजना म विशेष पिछड़ी जनजाति जइसे अबुझमाड़िया, बिरहोर, बैगा, कमार अऊ पहाड़ी कोरवा, वन अधिकार पत्र धारी किसान मन संग पात्र हितग्राही मन ल शत-प्रतिशत जोड़े जाय। उमन अपूर्ण कार्य मन ल गुणवत्तापूर्ण अऊ जल्दी पूरा करे के निर्देश दीन।
बैठक म कृषि उत्पादन आयुक्त श्रीमती शहला निगार, विशेष सचिव कृषि डॉ. सारांश मित्तर, संचालक कृषि श्रीमती चंदन त्रिपाठी संग प्रबंध संचालक, अपर संचालक, सयुंक्त संचालक अऊ जिला के अधिकारी उपस्थित रहिन।
चक्रीय फसल मन बर किसान मन ल करव प्रोत्साहित: मंत्री श्री रामविचार नेताम
