रायपुर, 13 अक्टूबर 2020। राजधानी रायपुर समेत छत्तीसगढ़ म क्राइम के ग्राफ तेजी ले बढ़त हे। आए दिन प्रदेश म चाकूबाजी अउ लूट जइसे कई घटना मन आगु आवत हे। इही बीच राजधानी रायपुर ले एक बड़का खबर आगु आए हे। खबर हे कि जयस्तंभ चौक म अज्ञात बदमाश मन ह कार सवार कारोबारी ल चाकू मार दिस। ए घटना म कारोबारी गंभीर रूप ले घायल होगे। घायल कारोबारी ल उपचार बर मेकाहारा अस्पताल ले जाए गिस। उहें सूचना मिले ले मउका म पहुंचे पुलिस आरोपी मन के तलाश करत हे।
मिले जानकारी के अनुसार कोंडागांव निवासी कारोबारी इसरार अहमद अपन निजी काम ले रायपुर आए रिहिस। काम खतम करे के बाद वो घर लहुटे ले पहली जयस्तंभ चौक म कार खड़ा करके बइठे रिहिस। इही बीच चार अज्ञात बदमाश मन ह इसरार अहमद ऊपर चाकू ले हमला कर दिस। हालांकि अभी ए बात के खुलासा नई होए हे कि आरोपी मन ह इसरार ऊपर हमला काबर करिन हे। घायल इसरार ल उपचार बर मेकाहरा म भर्ती कराए गए हे, जिहां उंखर हालत गंभीर बताए जावत हे।