दिव्यांग मन के टी-20 चैंलेंजर ट्रॉफी म छत्तीसगढ़ के खिलाड़ी विल्सन जाटवर के चयन

जांजगीर-चांपा, फिजिकली चैलेंज्ड क्रिकेट एसोसिएशन ऑफ इंडिया (पीसीसीएआई) कोति ले आयोजित टी-20 चैलेंजर ट्राफी (हॉप कप) फॉर फिजिकल चैलेंजड 2021 म छत्तीसगढ़ ले एकमात्र अस्थि बाधित दिव्यांग खिलाड़ी विल्सन जाटवर के चयन बल्लेबाज के रूप म होय हे। समाज कल्याण मंत्री श्रीमती अनिला भेड़िया ह विल्सन ल बधाई देवत वोकर उज्जवल भविष्य के शुभकामना देहे हें।
टी-20 चैलेंजर ट्राफी क्रिकेट प्रतियोगिता पंजाब के चंडीगढ़ स्थित ताऊ देवी लाल क्रिकेट स्टेडियम पंचकुला म अवइया 28 ले 31 दिसम्बर तक आयोजित करे जाही। दिव्यांग मन बर आयोजित टी-20 चैलेंजर ट्राफी म देश के चार जोन के टीम खेलेही। जेमां विल्सन ईस्ट जोन ले खेलेही। एमां ले उत्कृष्ट प्रदर्शन वाले खिलाड़ी के चयन दिव्यांगजन के भारतीय टीम बर करे जाही।
जांजगीर-चांपा जिला के बासिन निवासी विल्सन जन्म ले ही दिव्यांग हे। वो ह सामान्य लइका मन के संग क्रिकेट खेलत वाराणसी म सर्वश्रेष्ठ प्रदर्शन करके चयनकर्ता मन के ध्यान अपन कोति खींचिस। विल्सन जाटवर के प्रोत्साहन अउ उत्कृष्ठ प्रदर्शन बर जिला प्रशासन कोति ले क्रिकेट किट प्रदान करे गीस जेमां ओ ल बैट, बाल, पैड, हैलमेट, जूता संग ट्रेकसूट देहे गए हे । विल्सन के बताती वोखर पैर म 40 प्रतिशत अक्षमता हे जेखर से ओ ल खेले म दिक्कत तो होथे, फेर शौक अऊ हौसला ले वो सरलग आगू बढ़त हे। वो ह छत्तीसगढ़ संग उत्तरप्रदेश, मध्यप्रदेश अऊ महाराष्ट्र म क्रिकेट प्रतियोगिता मन म भाग लेहे हे। ओखर सपना अच्छा प्रदर्शन ले छत्तीसगढ़ के नाम रौशन करे के हे।