चमोली सुरंग हादसा: कोंडागांव के मृतक श्रमिक मन के परिजन ला 5-5 लाख अउ घायल मन ला 50-50 हजार रुपिया सहायता के निर्देश

रायपुर, मुख्यमंत्री श्री विष्णु देव साय ह उत्तराखंड के चमोली म निर्माणाधीन सुरंग म पानी भरे के दुखद घटना म कोंडागांव जिला के 4 श्रमिक मन के निधन उपर गहरा दुख प्रकट करे हवंय। मुख्यमंत्री ह मृतक श्रमिक मन के परिजन ला 5-5 लाख रुपिया अउ हादसा म घायल दूनों श्रमिक मन ला 50-50 हजार रुपिया के आर्थिक सहायता देहे के निर्देश देहे हवंय।
ए हादसा म कोंडागांव जिला के ग्राम धनसुली के 2, मदनार के 1 अउ दहीकोंगा के 1 श्रमिक के मउत हो गे हे, जबकि जिला के 2 श्रमिक घायल होए हवंय। दिवंगत श्रमिक मन के पार्थिव शरीर ला कोंडागांव लाए गीस, जिहां परिवार के लोगन मन के मौजूदगी म ओ मन के अंतिम संस्कार करे गीस।
मुख्यमंत्री श्री साय ह कहिन के राज्य सरकार दुख के ए बेरा म शोकाकुल परिवार मन के संग पूरा संवेदनशीलता के साथ ठाढ़े हे अउ ओ मन ला हरसंभव मदद पहुंचाए जाही।
मुख्यमंत्री ह भगवान ले दिवंगत आत्मा मन के शांति अउ शोकाकुल परिवार मन ला ए भारी दुख ला सहे के सक्ति देहे बर प्राथना करे हवंय। उमन हादसा म घायल दूनों श्रमिक मन के जल्दी बने होए के घलो कामना करे हवंय।