छत्तीसगढ़ म बरसा होए के संभावना, परगे हांका

रायपुर, पहाड़ कोति गिरत बरफ के पाए के देस के भंडार डहर अऊ प्रदेश के कई जगा म जिवलेवा जाड़ परत हे। जाड़ ले बांचे बर मनखे मन अलाव अऊ कथरी-गोदरी के सहारा लेवत हें। एही बीच मौसम विभाग ह एक बार फेर देश के कई राज्य मन म बरसा होए के चेतावनी जारी कर देहे हे। मौसम विभाग ह बिहार-झारखंड-मध्यप्रदेश-उड़ीसा-पश्चिम बंगाल संग कई राज्य मन म बरसा होए के संभावना बताए हे। बरसा होए के सेती ए राज्य मन म शीतलहर अऊ जादा बाढ़ जाही।
आज उत्‍तरप्रदेश-पंजाब-उत्तराखंड संग कई प्रदेश म भिनसरहा कोहरा छाए रहिस हे। दिल्ली-एनसीआर संग उत्तर भारत के राज्य मन म दिन म घाम निकले रहिस हे, फेर ठंडा हवा के गरेरा चलते रहिस हे।
मौसम विभाग ह अवइया 27 ले 29 दिसंबर को मध्य प्रदेश, विदर्भ, छत्तीसगढ़, बिहार, झारखंड, ओडिशा अऊ पश्चिम बंगाल अऊ सिक्किम म छिटपुट वर्षा के आशंका जताए हे। 26 अऊ 27 तारीक के जम्मू संभाग अऊ निचला हिमाचल प्रदेश म अऊ 27 अऊ 28 दिसंबर, 2021 के उत्तराखंड म अलग-अलग करा गिरे के घलोक संभावना हे। मौसम विभाग के मुताबिक हिमाचल प्रदेश म आजो उंचहा जगा मन म बरु गिरे के संभावना हे। इतवार के पहाड़ी इलाका मन म हल्का बरसा अऊ बरफ गिरे के आसार हे।